ەمبى پوليگونى قازاقستاننىڭ اسكەريلەرىنە قاجەت ەمەس - ق ر قورعانىس مينيسترلىگى

استانا. قازاقپارات - ەمبى سىناق پوليگونى قازاقستاننىڭ اسكەري ماقساتتارى ءۇشىن پايدالانىلمايدى. بۇگىن ق ر پارلامەنتى ءماجىلىسىنىڭ جالپى وتىرىسىندا ق ر قورعانىس ءمينيسترىنىڭ ورىنباسارى تالعات مۇحتاروۆ وسىلاي ءمالىم ەتتى،

  دەپ حابارلايدى قازاقپارات.

 «قازىرگى ۋاقىتتا جوسپار بويىنشا بۇل پوليگوننىڭ ۋچاسكەلەرى تولىقتاي اقتوبە وبلىسى اكىمدىگىنىڭ قاراماعىنا بەرىلەدى. ارى قاراي ونى اۋىل شارۋاشىلىعى، پايدالى قازبالاردى ءوندىرۋ ءۇشىن پايدالانۋ كوزدەلىپ وتىر. اتاپ ايتقاندا، قورعانىس مينيسترلىگى ءوزىنىڭ اسكەري دايىندىعىندا پوليگون جەرىن پايدالانۋدى ەسكەرىپ وتىرعان جوق»، - دەدى مۇحتاروۆ.

بۇدان بۇرىن حابارلانعانداي، ماجىلىستە پالاتا دەپۋتاتتارى «1995 -جىلعى 20 - قاڭتارداعى ق ر مەن ر ف اراسىنداعى ەمبى پوليگونىن پايدالانۋ جانە جالعا بەرۋ شارتتارى تۋرالى كەلىسىمىنىڭ جانە 1996 -جىلعى 18 - قازانداعى قازاقستان ۇكىمەتى مەن رەسەي ۇكىمەتى اراسىنداعى ەمبى سىناق پوليگونىن جالداۋ تۋرالى شارتتىڭ قولدانىسىن توقتاتۋ جونىندەگى شارالار تۋرالى ق ر مەن ر ف اراسىنداعى حاتتامانى راتيفيكاتسيالاۋ تۋرالى» زاڭ جوباسىن ماقۇلدادى.

وسى حاتتاماعا 2016 -جىلعى 20 - قازاندا ماسكەۋدە قول قويىلدى. قۇجاتتا ەمبى سىناق پوليگونىن جالداۋ جانە پايدالانۋ ءتارتىبىن رەتتەيتىن حالىقارالىق شارتتاردىڭ قولدانىسى توقتاتىلادى. سونداي- اق رەسەيگە ۋاقىتشا پايدالانۋعا بەرىلگەن جەر تەلىمدەرىن، جىلجىمالى نەمەسە جىلجىمايتىن مۇلىكتەردى قابىلداۋ جونىندەگى قاجەتتى شارالاردى جۇرگىزۋ كوزدەلگەن.

مۇحتاروۆ اتالعان پوليگون يادرولىق سىناق الاڭى ساناتىنا جاتپايتىنىن، سوندىقتان دا تۇرعىندار مەن جەرگىلىكتى بيلىك ورگاندارى تاراپىنا قانداي دا ءبىر اۋرۋلاردىڭ تۋىنداۋىنا بايلانىستى شاعىمدار تۇسپەگەنىن اتاپ ءوتتى.

اۆتور: رۋسلان عابباسوۆ