رۋمىنيا ەكسپو كورمەسىنە الەمدەگى ەڭ جىلدام لازەردى ۇسىنباق
بۇل تۋرالى بۇگىن ەلورداداعى تاۋەلسىزدىك سارايىندا وتكەن ەكسپو-2017 كورمەسىنە قاتىسۋشىلاردىڭ ءۇشىنشى جينالىسى اياسىندا ۇيىمداستىرىلعان باسپا ءسوز ءماسليحاتىندا رۋمىنيا ۇلتتىق پاۆيلونىنىڭ وكىلى راۋد پەتۋر ءمالىم ەتتى، دەپ حابارلايدى قازاقپارات.
ونىڭ اتاپ وتۋىنشە، رۋمىنيانىڭ لازەرلەر ءوندىرۋ سالاسىندا مول تاجىريبەسى بار. «ءبىزدىڭ پاۆيلوندا لازەرلەر الەمىندەگى ەڭ ۇزدىك مودەلدەر بولادى»، - دەدى رادۋ پەترۋ.
سونىمەن قاتار ول رۋمىنيادا وتە جاقسى شاراپتار دا وندىرىلەتىندىگىن باسا ايتتى.
«ءوزىمىزدىڭ بىرەگەي ەنەرگيا كوزىمىز - شارابىمىزدى دا تانىستىراتىن بولامىز. رۋمىنيا شاراپتى التى مىڭ جىل بويى دايىنداپ كەلەدى جانە ءبىز ونى ەكسپو اياسىندا ۇسىناتىندىعىمىزعا قۋانىشتىمىز»، - دەدى ول.
ايتا كەتەيىك، ەكسپو-2017 حالىقارالىق مامانداندىرىلعان كورمەسى ۇستىمىزدەگى جىلدىڭ 10 -ماۋسىمىندا باستالىپ، 10- قىركۇيەكتە اياقتالادى. كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى مارتە ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى، ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگىن ت م د ەلدەرىنىڭ جانە قىتايدىڭ ازاماتتارى قۇرايدى دەپ كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستاپ وتىر.
اۆتور: مارلان جيەمباي
