ديماش قۇدايبەرگەن كەلەسى كەزەڭدە قازاقستاندىق ونەرپازداردىڭ سۇيەمەلدەۋىمەن قازاقشا ءان ورىندايدى

استانا. قازاقپارات - قىتايدا ءوتىپ جاتقان «Singer-2017» ءان جارىسىنىڭ كەلەسى كەزەڭىندە الەمگە تانىلىپ ۇلگەرگەن قازاق ءانشىسى ديماش قۇدايبەرگەن حالىق ءانى «دايديداۋ» ءانىن ورىندايدى.

بۇل تۋرالى مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى، دەپ حابارلايدى قازاقپارات.

«دوستار، جاقسى جاڭالىق! ديماش قۇدايبەرگەن قىتايدا ءوتىپ جاتقان «Singer-2017» كونكۋرسىندا قازاق ۇلتتىق ونەر ۋنيۆەرسيتەتىنىڭ حالىق اسپاپتار ءانسامبلىنىڭ سۇيەمەلدەۋىمەن «دايديداۋ» ءانىن ورىندايدى»، - دەپ حابارلادى مينيستر فەيسبۋك الەۋمەتتىك جەلىسىندەگى پاراقشاسىندا.

 مۇحامەدي ۇلىنىڭ ايتۋىنشا، مادەنيەت جانە سپورت ءمينيسترىنىڭ مۇرىندىق بولۋىمەن حالىق اسپاپتار ءانسامبلى قىتايعا بارىپ، قازىر كونكۋرسقا دايىندالىپ جاتىر.

 «ايتا كەتەيىن دەگەنىم، ديماشتىڭ كۋرستاستارى قۋانا- قۋانا قىتايعا كەتتى جانە ديماشپەن بىرگە تاماشا ونەر كورسەتپەك. قىز- جىگىتتەر كونكۋرسقا ارناپ تىگىلگەن ۇلتتىق كيىمدەردى كيىپ شىعادى»، - دەپ حابارلادى مينيستر.

ايتا كەتەيىك، ديماش قۇدايبەرگەن «سلاۆيان بازارى» حالىقارالىق ءان جارىسىندا وسى «دايديداۋ» ءانىن ورىنداپ، باس جۇلدەنى  يەلەنگەن بولاتىن.

اۆتور: كەنجەكەي توقتامۇرات قىزى