نازاربايەۆ عىلىم مينيسترلىگىن قۇرۋ تۋرالى ۇسىنىستى قولدامادى

الماتى. قازاقپارات - قازاقستان پرەزيدەنتى نۇرسۇلتان نازربايەۆ ق ر  ۇ ع ا- نىڭ جالپى جينالىسىنىڭ سەسسياسىندا باستى بايانداماشىلاردىڭ ءبىرى مولدوۆا عىلىم اكادەمياسىنىڭ پرەزيدەنتى گەورگي دۋكانىڭ سوزىنە پىكىر قوستى، دەپ حابارلايدى قازاقپارات ءتىلشىسى.

شەتەلدىك عالىم بايانداماسىندا «عىلىم اكادەمياسىنىڭ باسشىسى مينيستر دارەجەسىمەن تەڭ» دەگەن پىكىر ءبىلدىردى. ول اكادەميا پرەزيدەنتىن عىلىمي قاۋىمداستىق سايلايتىنىن، سودان كەيىن ول اۆتوماتتى تۇردە ۇكىمەت قۇرامىنا كىرىپ، عىلىم ءمينيسترى اتاناتىنىن ايتتى.

«وسىلايشا، ءبىز عىلىمي قاۋىمداستىقتى بىرىكتىرۋگە ارەكەت ەتتىك. ويتكەنى، ناقتى تاپسىرمالاردى ورىنداۋعا سول سىنشىل قاۋىمداستىقتىڭ پىكىرى جەتىسپەيدى. سىنشىل قاۋىمداستىقتى قۇرۋ ءۇشىن وزگە ەلدەرمەن قارىم- قاتىناس، ەل ىشىندەگى ءتۇرلى عىلىمي قاۋىمداستىقتارمەن بايلانىس سەكىلدى ءتۇزۋ مىندەت قويىلدى»، - دەدى مولدوۆالىق عالىم.

قازاقستان پرەزيدەنتى بۇل پىكىرگە قاتىستى: «ءسىزدىڭ اكادەميا پرەزيدەنتىن مينيستر جاساۋ تۋرالى ۇسىنىسىڭىز جاقسى قابىلداندى. اسىرەسە، عىلىم اكادەمياسىنىڭ باسشىلارى مۇنى جاقسى قابىلدادى. ءبىراق ءبىز بۇل كەزەڭنەن ءوتىپ كەتتىك. عىلىمعا الەۋەتتى ۆەرتيكالدى باسقارۋ قاجەت ەمەس. قۇرامىز، بۇل قيىن ەمەس. ماسەلە شىقسا، نەگە قاجەت ەكەنىن انىقتاپ الماي مينيسترلىك قۇرا سالۋدان ءبىزدىڭ «جاقسى» تاجىريبەمىز بار. بۇل عالىمدار بارىپ اقشا سۇرايتىن تاعى ءبىر بيۋروكراتيالىق ورگان بولادى»، - دەدى ەلباسى.

«ءبىز باسقاشا جاسادىق. اقشا عالىمعا جەتكەنگە دەيىن 5 ساتى بولدى. ءبىرىنشى، سالالىق ورتالىققا، عىلىم مينيسترلىگىنىڭ كوميتەتىنە، سوسىن مينيسترلىككە، سوسىن عىلىمي كەڭەسكە، سوسىن بارىپ عالىمنىڭ عىلىمىنا جەتەتىن. ءبىز مۇنىڭ ءبارىن الىپ تاستادىق. ۇشەۋىن عانا قالدىردىق. ەگەر عىلىمي كەڭەس جاڭالىق قاجەت، ينننوۆاتسيا بار دەپ شەشسە، بىردەن قارجىلاندىرىلادى»، - دەدى ەلباسى.

ايتا كەتەيىك، بۇگىنگى جيىندا ەلباسىنا قازاقستان مەن مولدوۆا اراسىنداعى دوستىق پەن ىنتىماقستاستىقتى دامىتقانى ءۇشىن نيكولاي ميلەسكۋ سپەتارۋ اتىنداعى مەدال تابىس ەتىلدى.

اۆتور: الماس مۇقاش ۇلى