قازاق قىزى ءومىر بويى تۇرىك ازاماتىنا تۇرمىسقا شىعۋدى ارمانداپ كەلەدى

استانا. قازاقپارات - قازاق قىزى ساعىنىش ۇدەربايەۆا بالا كۇنىنەن تۇرىك ازاماتىنا تۇرمىسقا شىعۋدى ارمانداپ كەلەدى ەكەن.

بۇعان تۇرىك تەلەحيكايالارىنداعى اكتەرلەردىڭ ءمىنسىز وبرازى اسەر ەتكەن- ءدى.

بۇل تۋرالى «پەندەمىز عوي» باعدارلاماسىندا ايتىلدى.

ارالاس نەكەگە ەلىمىزدىڭ ەتى ۇيرەنىپ كەتتى. بۇعان كوپ ۇلتتى مەملەكەت بولۋىمىز سەبەپ بولسا كەرەك. قىزدارىن شەتەلدىك ازاماتقا دۇركىرەتىپ شىعارىپ سالىپ جاتقان اتا- انالاردى دا كوزىمىز كورىپ ءجۇر. ولاردى جاقتايتىن دا، داتتايتىن دا ادامدار بار. حالقىمىز سىمباتتى قازاق جىگىتتەرىنىڭ كوپ ەكەنىن تىلگە تيەك ەتۋدە. نەگە بۇگىنگى قاراكوز قىزدارىمىز شەتەلدىك ازاماتقا تۇرمىسقا شىعۋعا اۋەس؟ بىرەۋلەر ونىڭ ءمانىسىن باقۋاتتى ءومىر سۇرۋمەن بايلانىستىرسا، ەندى بىرەۋلەرى ونى قازىرگى كەزدەگى ەر ازاماتتاردىڭ رولىمەن تۇسىندىرەدى. «بۇگىن قازاق قىزىنا تەڭ كەلەتىن قازاقتىڭ جىگىتتەرىنىڭ ءرولى تومەندەپ كەتكەن. ياعني قىز بالا وقىعاننان كەيىن وزىنەن تومەن، ءبىلىمسىز، قارا جۇمىسقا جەگىلىپ جۇرگەن قازاق جىگىتىنە تۇرمىسقا شىققىسى كەلمەيدى»، - دەيدى پسيحولوگ مامان سايات بايمۇرات ۇلى.

ستاتيستيكاعا كوز جۇگىرتسەك، 2016 -جىلدىڭ قاڭتار- ءساۋىر ايلارىندا 699 قالىڭدىق شەتەلدىككە تۇرمىسقا شىققان. ونىڭ 223 ى رەسەيگە، قالعانى گەرمانيا، ا ق ش، تۇركيا، يزرايل جانە ت. ب. مەملەكەتتەردىڭ ازاماتىمەن كوڭىل جاراستىرعان. قازاقتىڭ قىزىن سورلاتقاندار دا، جاپ- جاقسى وتباسىن قۇرىپ وتىرعاندار دا بار. جاتقا كەتكەن قىز بەن ودان تۋعان جيەننىڭ «قازاق» دەپ ەمىرەنە قويماسى انىق. ءبىراق كەي ادام قازاق قىزى جات جۇرتتىق بولعانىمەن، «جات ەلدىك» اتانباعان دەپ جاتادى.

«مەنىڭ اپكەم شەتەل ازاماتىنا تۇرمىسقا شىقتى. ەكەۋى دە باقىتتى ءومىر ءسۇرىپ جاتىر. بالا- شاعالارى دا بار. مەنىڭ ويىمشا، ونىڭ شەتەل ازاماتىنا تۇرمىسقا شىققانىندا تۇرعان ەش نارسە جوق. باستىسى، باقىتتى بولسا بولعانى»، - دەيدى فاريزا ەسىموۆا. ال ستۋديا قوناعى ساعىنىش ۇدەربايەۆا ءالى تۇرمىسقا شىقپاعان. دەسە دە، بالا كۇنىنەن تۇرىك ازاماتىمەن وتباسىن قۇرۋدى ارمانداپ كەلەدى ەكەن.

«تۇرمىستا بولماعانمىن، جىگىتىم جوق. بالا كۇنىمنەن تۇرىك تەلەحيكايالارىن كورىپ وسكەن اداممىن. وسى ۋاقىتقا دەيىن سول تەلەحيكايالارداعى تۇرىك ازاماتتارىن ۇناتىپ كەلدىم. جالپى شەتەل ازاماتىنا تۇرمىسقا شىعۋعا قارسى ەمەسپىن. بىرىنشىدەن، تۇرىك ازاماتتارى وتە سىمباتتى كەلەدى. بويلارى ۇزىن، جاۋاپكەرشىلىكتەرى مول. ولارعا ۇقسايتىن قازاقتىڭ جىگىتتەرى دە بار. ءبىراق جىگىتكە جان- جاقتى قارايمىن. مىسالى، تۇرىك ازاماتتارىنىڭ كوركىنە اقىلى ساي. ولاردىڭ جۇمىستا دا، وتباسىندا دا جاۋاپكەرشىلىكتەرى مول. شىنايى ومىردە تۇرىك ازاماتتارىن كەزدەستىرگەن ەمەسپىن. ارينە، ولاردان كوڭىلىمنىڭ قالىپ- قالمايتىنىن ۋاقىت كورسەتەدى. سەبەبى، مەن بەتپە-بەت تۇرىك جىگىتىمەن كەزدەسىپ كورمەدىم. ەكىنشىدەن، جاقىنىراق كەلە كوزقاراسىڭنىڭ وزگەرۋى دە عاجاپ ەمەس. مەنىڭ تالابىما ساي تۇرىك ازاماتى كەزدەسىپ جاتسا، ۇسىنىستان باس تارتپايمىن»، - دەيدى ول.