تەڭىز شايانىنا شابۋىلداعان سەگىزاياقتىڭ ءيتبالققا جەم بولعان ءساتى ۆيدەوعا ءتۇسىپ قالعان - كەسكىن

استانا. قازاقپارات - جەلىدە سۋ استىندا سەگىزاياق (وسمينوگ) پەن تەڭىز شايانىنىڭ (كراب) ايقاسى پايدا بولدى.

ونى كاليفورنيالىق مونتەرەي قالاسى ماڭىنداعى جاعالاۋدا امەريكاندىق اكۆالانگيستەر ءتۇسىرىپ العان. سەگىزاياق بىرنەشە رەت تەڭىز شايانىنا شابۋىل جاسادى. ول قىشقاشتاي اياقتارىمەن قورعانىپ، قۇتىلماققا ارەكەتتەنىپ باقتى. قارسىلاستار سۋ استىنداعى قۇمدى بۇرقىراتا ءبىرى قاشىپ، ءبىرى قۋىپ جاتقان ساتتە عايىپتان ءيتبالىق شىعا كەلىپ، سەگىزاياقتى ءبىر-اق قىلعىتتى.

«سۋ استىنداعى ساياحاتتا بىزگە وسى ءيتبالىق ءجيى ەرىپ جۇرەدى. ول ءبىزدىڭ بالىق اۋلاعاندا قولداناتىن شامىمىزدىڭ جارىعىن پايدالانۋدى دا ۇيرەنگەن. بۇل جولى دا بىزبەن بىرگە ءجۇزىپ جۇرگەن بولاتىن، ءبىراق اياق استىنان جوق بولىپ كەتتى. ءبىز سۋ تۇبىندە ۇلى ايقاستى كوردىك جانە يتبالىق كەلگەنشە تۇسىردىك»، - دەيدى روليك اۆتورى.

اۆتور: ەرلان قوجاكەلديەۆ