قالمۇحانبەت قاسىموۆ توتەنشە جاعدايلاردىڭ الدىن الۋعا قاراجاتتى ەسەلەۋدى ۇسىندى

استانا. قازاقپارات - ق ر ىشكى ىستەر ءمينيسترى قالمۇحانبەت قاسىموۆ الدىن الۋ شارالارىن قارجىلاندىرۋدىڭ ءتاسىلىن قايتا قاراۋدى ۇسىندى، دەپ حابارلايدى قازاقپارات.

ونىڭ ايتۋىنشا، بىرەر كۇن بۇرىن ق ر پرەمەر- ءمينيسترىنىڭ ءبىرىنشى ورىنباسارى اسقار ءماميننىڭ قاتىسۋىمەن وڭىرلەردىڭ كوكتەمگى تاسقىنعا دايىندىق بارىسى پىسىقتالعان.

«بەلگىلى ءبىر جۇمىس اتقارىلىپ جاتىر، ءبىراق ايماقتار تولىق دايىن دەپ ايتۋعا بولمايدى. ءبىرقاتار پروبلەمالار بار»، - دەدى مينيستر.

«جەرگىلىكتى ورگانداردا الدىن الۋ شارالارىن قارجىلاندىرۋدىڭ تاسىلدەرىن قايتا قاراۋ كەرەك. ماسەلەن، 2010-2016 -جىلدار ارالىعىندا جەرگىلىكتى بيۋدجەتتەن توتەنشە جاعدايلاردىڭ الدىن الۋعا 17,9 ميلليارد تەڭگە بولىنگەن. دەگەنمەن رەسپۋبليكالىق بيۋدجەتتەن توتەنشە جاعدايدىڭ كەلتىرگەن سالدارلارىن جويۋ ءۇشىن 30 ميلليارد تەڭگە ءبولىنىپتى. بۇل 1,7 ەسە كوپ»، - دەدى ق. قاسىموۆ.

ونىڭ ۇستىنە، ءمينيستردىڭ حابارلاۋىنشا، قاراعاندى وبلىسىندا 2010 -جىلدان 2015 -جىلعا دەيىن جەرگىلىكتى بيۋدجەتتەن توتەنشە جاعدايلاردىڭ الدىن الۋ شارالارىنا 225 ميلليون تەڭگە بولىنگەن بولسا، تەك 2015 -جىلى توتەنشە جاعدايلاردىڭ سالدارلارىن جويۋعا ۇكىمەت قورىنان 3 ميلليارد تەڭگە جۇمسالدى.

 سولتۇستىك قازاقستان وبلىسىندا بۇگىنگى تاڭدا توتەنشە جاعدايلار قورىندا 100 ميلليون تەڭگە بار. ال شۇعىل شىعىندار ءۇشىن 223 ميلليون تەڭگە قاراستىرىلىپتى. 2016 -جىلى بۇل وبلىسقا تاسقىننىڭ سالدارلارىن جويۋعا رەسپۋبليكالىق بيۋدجەتتەن 1,3 ميلليارد تەڭگە بولىنگەن.

 اۆتور: جاسۇلان جولدىبايەۆ