ەلىمىزدىڭ التى وبلىسىندا سۋ تاسۋى مۇمكىن - ق ر ءى ءى م

استانا. قازاقپارات - قازاقستاننىڭ التى وبلىسىندا سۋ تاسۋى مۇمكىن. بۇل تۋرالى بۇگىن ۇكىمەت وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات.

«اعىمداعى جىلى سۋدىڭ مول كولەمىن اقمولا، اقتوبە، شىعىس قازاقستان، قاراعاندى، قوستاناي جانە سولتۇستىك قازاقستان وبلىستارىندا بولجانىپ وتىر. قازىرگى كەزدە ەلىمىز بويىنشا تاۋەكەل ايماعىنداعى 918 ەلدى مەكەن، 1,5 مىڭنان استام اۆتوموبيل جانە تەمىر جولدار ايقىندالدى»، - دەدى مينيستر.

ونىڭ سوزىنە قاراعاندا، وتكەن جىلى ەلدى مەكەندەردى ينجەنەرلىك تۇرعىدا قورعاۋ ماقساتىندا 122 شاقىرىم بوگەت سالىنىپ، 146 شاقىرىمىنا جوندەۋ جۇمىستارى جۇرگىزىلدى. سونىمەن قاتار اعىمداعى جىلى سۋ وتكىزەتىن قۇبىرلاردى تازارتۋ جۇمىستارى جۇزەگە اسىرىلعان كورىنەدى.

«قازگيدرومەتتىڭ» وڭىرلەردە جۇرگىزگەن مونيتورينگى نەگىزىندە كوكتەمدە توتەنشە جاعدايدى الدىن الۋ بويىنشا شارالار جوسپارى ازىرلەنىپ، ىسكە اسىرىلۋدا. جەرگىلىكتى جەرلەردە ت ج- نى جويۋعا قاتىستى وبلىستىق، قالالىق، اۋداندىق كوميسسيالاردىڭ وتىرىستارى ءوتتى»، - دەدى قاسىموۆ.

تۇرعىن ۇيلەردى سۋ باسۋعا جول بەرمەس ءۇشىن ەلدى مەكەندەردى قاردان تازارتۋ جۇمىستارى ءجۇرىپ جاتىر. قازىرگى كەزدە 6,2 ميلليون تەكشە مەتر قار شىعارىلعان ەكەن.

 ءمينيستردىڭ اتاپ وتۋىنشە، كوكتەمگى كەزەڭگە 8 مىڭ توننا جانار- جاعارماي، 180 مىڭ توننا ينەرتتى ماتەريالدار، 829 مىڭ قاپ جانە 10 توننا جارىلعىش زات دايارلاندى. كەزەك كۇتتىرمەيتىن شىعىندار بويىنشا توتەنشە رەزەرۆتەرگە اكىمدىكتەر بيۋدجەتتەردە 20 ميلليارد تەڭگە قاراستىرىپ قويدى.

اۆتور: رۋسلان عابباسوۆ