اسكەري قىزمەتشىلەر قار كوشكىنىنەن مەرت بولعان پولكتىڭ كومانديرى قىزمەتىنەن كەتتى
دەپ حابارلايدى قازاقپارات.
«قازىرگى ۋاقىتتا قورعانىس ءمينيسترى پولك كومانديرى ءبىرالينوۆ پەن ءبولىم شتابىنىڭ باستىعى شولبەكوۆتى قىزمەتىنەن بوساتۋ تۋرالى شەشىم قابىلدادى»، - دەدى ق ر قورعانىس ءمينيسترىنىڭ ورىنباسارى تالعات مۇحتاروۆ ەل ۇكىمەتى وتىرىسىنان كەيىنگى باسپا ءسوز ءماسليحاتىندا.
ونىڭ ايتۋىنشا، بۇل تارتىپتىك شەشىم جانە ولارعا قاتىستى قىلمىستىق ءىس قوزعالمايدى.
«ۇكىمەتتىك كوميسسيا تاراپىنان اتالعان وقۋ- جاتتىعۋ شارالارىن وتكىزۋدى ۇيىمداستىرۋعا قاتىستى سۇراقتار بولدى. سوندىقتان قورعانىس ءمينيسترى اتالعان لاۋازىمدى قىزمەتكەرلەردى لاۋازىمدارىنان بوساتۋ تۋرالى شەشىم قابىلدادى»، - دەدى مۇحتاروۆ.
ەسكە سالا كەتەيىك، اقپاننىڭ 17- كۇنى جامبىل وبلىسى جۋالى اۋدانىنداعى كوكساي شاتقالىندا بولعان قار كوشكىنى كەزىندە اسكەري دايىندىقتارىن جۇرگىزگەن اسكەريلەر قازا تاپتى. 16 ادام قۇتقارىلسا، 7 سارباز قايتىس بولدى. رەسمي مالىمەتكە سايكەس، قايتىس بولعان ساربازداردىڭ وتباسىلارىنا 5 جىلدىق ايلىق ەسەپتىك كورسەتكىش مولشەرىندە ماتەريالدىق كومەك كورسەتىلەدى.
اۆتور: مارلان جيەمباي
