يلحام اليەۆ ايەلىن ءوزىنىڭ ورىنباسارى ەتىپ تاعايىندادى
2017 -جىلى اقپاننىڭ 21- كۇنى ازەربايجان پرەزيدەنتى يلحام اليەۆتىڭ رەسمي سايتىندا ونىڭ ايەلى مەحريبان اليەۆانى ۆيتسە- پرەزيدەنت لاۋازىمىنا تاعايىنداۋ تۋرالى جارلىعى جاريالاندى.
«م. ا. اليەۆانى ازەربايجان رەسپۋبليكاسىنىڭ ءبىرىنشى ۆيتسە- پرەزيدەنتى لاۋازىمىنا تاعايىنداۋ تۋرالى» جارلىقتا يلحام اليەۆتىڭ «ازەربايجان كونستيتۋتسياسىنىڭ 103-بابىنىڭ 1-تارماعىنا سۇيەنگەنى» جازىلعان.
الايدا يلحام اليەۆتىڭ رەسمي سايتىنداعى ازەربايجان كونستيتۋتسياسىنىڭ 103-بابى «ازەربايجان پرەزيدەنتى بولىپ سايلانعان تۇلعانىڭ انت بەرۋى» دەپ اتالادى جانە 1-تارماعىندا «ازەربايجان پرەزيدەنتى بولىپ سايلانعان ادامنىڭ ءۇش كۇن ىشىندە.. . ازەربايجان پرەزيدەنتى قىزمەتىن اتقارا وتىرىپ، كونستيتۋتسيانى، ەل ەگەمەندىگى مەن اۋماقتىق تۇتاستىعىن ساقتاۋ، حالىققا ادال قىزمەت ەتۋگە انت بەرەتىنى» ايتىلعان.
كۇيەۋىنىڭ بۇل جارلىعى ارقىلى 52 جاستاعى مەحريبان اليەۆانىڭ ازەربايجان ساياسي جۇيەسىندەگى ورنى كوتەرىلە ءتۇستى. بۇعان دەيىن ول ازەربايجان پارلامەنتى - ميللي ءماجىلىستىڭ دەپۋتاتى عانا بولىپ كەلگەن ەدى. ازەربايجان پرەزيدەنتى يلحام اليەۆتىڭ جۇبايى مەحريبان الييەۆا بۇدان بولەك يۋنەسكو جانە يسەسكو ەلشىسى، ازەربايجاننىڭ بۇرىنعى پرەزيدەنتى - بۇل ەلدىڭ قازىرگى باسشىسى يلحام الييەۆتىڭ اكەسى گەيدار الييەۆ اتىنداعى قوردىڭ پرەزيدەنتى.
مەحريبان اليەۆانىڭ ءومىر جولى
مەحريبان الييەۆانىڭ نەگىزگى ماماندىعى - مەديتسينا سالاسىنداعى كوز دارىگەرى. ول 1988 -جىلى م. سەچەنوۆ اتىنداعى ماسكەۋ مەملەكەتتىك مەديتسينالىق ينستيتۋتىن بىتىرگەن. 1988-1992 -جىلدار ارالىعىندا اكادەميك كراسنوۆتىڭ جەتەكشىلىگىمەن ماسكەۋدەگى كوز اۋرۋلارىن زەرتتەيتىن عىلىمي ينستيتۋتتا جۇمىس ىستەگەن. 1995 -جىلدان بەرى ءوزى قۇرعان ازەربايجان مادەنيەتى قورىنىڭ پرەزيدەنتى.
ازەربايجان پرەزيدەنتى يلحام الييەۆ ايەلى مەحريبان الييەۆاعا اكەسى گەيدار الييەۆتىڭ اتىنداعى وردەن تاپسىرىپ تۇر. باكۋ، 29 -ماۋسىم 2015 -جىل.
ول يلحام الييەۆكە 1983 -جىلى تۇرمىسقا شىققان. 2003 -جىلى ازەربايجاندى 1993 -جىلدان بەرى باسقارعان گەيدار الييەۆ قايتىس بولدى، بيلىكتى ونىڭ ۇلى يلحام قولىنا الدى.
كۇيەۋى پرەزيدەنت بولعان مەحريبان الييەۆانىڭ دا ازەربايجانداعى ىقپالى كۇشەيە ءتۇستى. مەحريبان وتباسىنىڭ بارلىق مۇشەلەرى اكادەميالىق ورتادا، ساياساتتا جوعارى مارتەبە يەلەندى. ونىڭ اتاسى مير دجالال - تانىمال جازۋشى. اكەسى اريف - باكۋدەگى ۇلتتىق اۆياتسيا اكادەمياسىنىڭ رەكتورى. اپكەسى نارگيز - ماسكەۋ مەملەكەتتىك ۋنيۆەرسيتەتىنىڭ باكۋدەگى فيليالىن باسقارادى.
ساياسي بولجامدار
ازەربايجاندا مەحريبان الييەۆاعا قاتىستى ساياسي بولجامدار 2013 -جىلى جازدا، ول «جاڭا ازەربايجان» پارتياسىنىڭ ءتوراعا ورىنباسارى بولىپ تاعايىندالعاندا كوبەيگەن ەدى. ويتكەنى، يلحام الييەۆ بيلىككە كەلەر الدىندا اكەسى گەيدار الييەۆ ونى وسى «جاڭا ازەربايجان» پارتياسىنىڭ ءتوراعا ورىنباسارى ەتىپ تاعايىنداپ، وعان پرەزيدەنتتىك لاۋازىمدى وتكىزىپ بەرۋ ءۇشىن سايلاۋ ۇيىمداستىرعان بولاتىن.
2013 -جىلى جازدا، ازەربايجاندا پرەزيدەنت سايلاۋى وتەر قارساڭدا وسى ەلدەگى شاعىن ءارى مەملەكەتكە تاۋەلدى «ازەربايجاننىڭ الەمدىك دەموكراتيالىق پارتياسى» پرەزيدەنت سايلاۋىنا الييەۆانى ۇسىناتىندارىن مالىمدەدى. كەيىن پارتيا وكىلدەرى بۇل مالىمدەمەنى پارتيادان ءبولىنىپ شىققان شاعىن توپتىڭ جاساعانىن ايتىپ، باستارىن اراشالاي باستادى. ءبىراق وسى وقيعا ازەربايجان پرەزيدەنتى يلحام الييەۆ بيلىكتى ايەلىنە وتكىزۋى مۇمكىن دەگەن سارىنداعى بولجامدارعا تۇرتكى بولعان ەدى.
اليەۆتەر مەن پاشاەۆتار اۋلەتىنىڭ ىقپالى
كەي ساراپشىلار «مەحريبان الييەۆانىڭ نەگىزگى قارۋى - ازەربايجاننىڭ مۇنايى مەن كوممۋنيكاتسياسىن، قۇرىلىس سالاسىن، پاناما جانە بريتاندىق ۆيرگين ارالدارىنداعى ءىرى وففشورلىق كومپانيالاردى قاراۋىندا ۇستاعان وتباسىلىق حولدينگتىڭ ميللياردتاعان دوللار قارجىسى» ەكەنىن ايتادى.
مەحريبان الييەۆانىڭ توركىنى - پاشايەۆتار اۋلەتى پرەزيدەنتكە جاقىن بولعاننىڭ ارقاسىندا ساياسي سالماقتارىن ۇلعايتىپ، قوماقتى داۋلەت جيناپ الدى. ازەربايجاندىق ساراپشى زافار گۋلييەۆتىڭ ايتۋىنشا، پاشايەۆتار ازەربايجاننىڭ بيلىك قۇرىلىمىنىڭ ەڭ جوعارعى دەڭگەيىنەن ورىن الۋعا ىنتالى، ولار ءتىپتى 2008 -جىلى مەحريباندى پرەزيدەنتتىككە ۇسىنۋ تۋرالى ويلاعان. 2013 -جىلى سايلاۋ قارساڭىندا زافار گۋليەۆ ازاتتىققا «ول كەزدە بۇل يدەيا ورىستەمەدى. مۇمكىن، وتباسى نە ۇكىمەت توقتاۋ سالعان شىعار. ءبىراق سودان بەرى مەحريبان الييەۆا مەن پاشايەۆتار بارلىق جاعىنان - قارجىلىق، ەكونوميكالىق جانە ىقپالدىلىق تۇرعىسىنان كۇشەيىپ كەتتى» دەگەن پىكىرىن ايتقان ەدى.
الايدا يلحام الييەۆتىڭ ءوزى ەشقاشاندا وتباسىلىق بيلىككە تالاس تۋرالى ايتقان ەمەس جانە ءسان كوشىنەن قالمايتىن جارىن «ازەربايجاننىڭ ەڭ سۇلۋ ايەلى» دەپ اتايدى. ونىڭ «پرەزيدەنتتىڭ ايەلى بولسا دا، ايەلدىڭ اتى - ايەل» دەگەن سوزدەرى اقپارات قۇرالدارى ارقىلى تاراپ كەتكەن. الييەۆ كوبىنەسە ايەلدى «وتباسىنداعى ماحابباتتىڭ، گارمونيانىڭ، تىنىشتىقتىڭ كەپىلى» رەتىندە سيپاتتايدى.
قالاي بولعاندا دا ازەربايجاندى بيلەپ وتىرعان الييەۆتەر اۋلەتى بۇرىنعى سوۆەت وداعىنداعى رەپرەسسيالىق رەجيمدى ساقتاپ قالعان، ەلدەگى اقپارات قۇرالدارى بوستاندىعىن شەكتەۋ، سىبايلاس جەمقورلىق پەن حالىقتى قىسىپ ۇستاۋ جاعىنان ايماقتا توپ باستاپ تۇر.
2009 -جىلى ازەربايجان بيلىگى كونستيتۋتسياعا وزگەرىس ەنگىزىپ، پرەزيدەنت مەرزىمىنە قاتىستى شەكتەۋ الىنىپ تاستالدى. 55 جاستاعى الييەۆتىڭ رەسۋرستارعا باي ەلدىڭ ماڭگى پرەزيدەنتى بولۋىنا تەحنيكالىق تۇرعىدا جول اشىق تۇر. الايدا ساراپشىلار يلحام الييەۆتىڭ دە ۋاقىت وتە كەلە اۋلەت ءداستۇرىن ساقتاپ، بيلىكتى وتباسى مۇشەلەرىنىڭ بىرىنە تاپسىراتىنىن ايتادى.
مەحريبان مەن يلحام الييەۆتەردىڭ ەكى قىزى مەن ءبىر ۇلى بار.
http://www.azattyq.org
