قىرعىزستاننىڭ سىرتقى ىستەر مينيسترلىگى اتامبايەۆتىڭ ءسوزى ءۇشىن جاۋاپ بەردى
دەپ حابارلايدى قازاقپارات قىرعىز رەسپۋبليكاسىنىڭ سىرتقى ىستەر مينيسترلىگى تاراتقان اقپاراتقا سىلتەمە جاساي وتىرىپ.
قىرعىز رەسپۋبليكاسىنىڭ پرەزيدەنتى المازبەك اتامبايەۆتىڭ 2017 -جىلدىڭ 17 - اقپانىندا ەۆرونيۋس تەلەارناسىنا بەرگەن سۇحباتىنداعى پىكىرىنە بايلانىستى، دينارا كەمەلوۆا قازاقستان ەلشىسىنە 2010 -جىلى ساۋىردە قىرعىز رەسپۋبليكاسىندا ورىن العان وقيعاعا بايلانىستى، قازاقستان تاراپى ەنگىزگەن شەكتەۋلەر مەن شەكارالار قىرعىز ازاماتتارى ءۇشىن ءبىراز قيىندىق تۋىنداتقانىن ايتتى.
ايتا كەتەيىك، المازبەك اتامبايەۆ سول سۇحباتىندا ەۋرازيالىق ەكونوميكالىق وداققا مۇشە بولۋ ماسەلەسىن ايتا كەلە، 2010 -جىلى قازاقستان تاراپى قويعان شەكتەۋلەرگە بايلانىستى، ادام ءولىمى بولعانىن ايتقان بولاتىن. سول سەبەپتى، قازاقستاننىڭ سىرتقى ىستەر مينيسترلىگى قىرعىز تاراپىنان بۇل پىكىردىڭ ءمان- جايىن ءتۇسىندىرۋدى سۇراعان ەدى.
دينارا كەمەلوۆا اتاپ وتكەندەي، راسىمەن دە، 2010 -جىلى قىرعىزستان ازاماتتارىنىڭ قازاسىنا اكەلىپ سوققان وقيعالار بولعان. سول جىلى ازاماتتار زاڭدى جولمەن شەكارادان اسا الماعان سوڭ، جاس جىگىتتەر شۋ وزەنىنەن ءجۇزىپ وتپەك بولعان. اۋىرىپ جاتقان بالاسىن شەكارادان اسىرا الماعان اتا- انانىڭ بالاسى قايتىس بولعان. سول ءبىر جارىم ايعا سوزىلعان شەكتەۋ كەزىندە قاتتى سىرقات ادامدارعا ءدارى جەتكىزۋ مۇمكىن بولماعان سوڭ، ناۋقاستار كوز جۇمعان. قىرعىز رەسپۋبليكاسىنا اسا قاجەتتى ءدارى- دارمەك جەتپەي قالعان سوڭ، مىڭداعان ادامنىڭ ومىرىنە قاۋىپ تونگەن. شەكارا جابىلعان سوڭ، قىرعىز حالقىنىڭ الەۋمەتتىك- ەكونوميكالىق جاعدايى ناشارلاپ، شيەلەنىس ءورشي تۇسكەن.
«الايدا، بۇدان ءارى كونسترۋكتيۆتى ءوزارا ءىس- قيمىل ورناتۋ ءۇشىن بۇل ماسەلەنى جاۋىپ، ەكى ەلدىڭ مەملەكەت باسشىلارى قويعان مىندەتتەردى ورىنداۋعا كىرىسۋى كەرەك»، - دەيدى د. كەمەلوۆا.
كەمەلوۆانىڭ ايتۋىنشا، 2003 -جىلدىڭ 25 - جەلتوقسانىندا بەكىتىلگەن مەملەكەتتىك شەكارا ارقىلى ءوتۋ پۋنكتتەرى تۋرالى ۇكىمەتارالىق كەلىسىم بۇزىلعان سوڭ، قازىر قازاق- قىرعىز شەكاراسىنداعى 12 باقىلاۋ- وتكىزۋ پۋنكتىنىڭ تورتەۋى جابىق تۇر.
اۆتور: كەنجەكەي توقتامۇرات قىزى
