بوزىمبايەۆ: بۇگىننەن باستاپ قازاق كۇرەسىنىڭ جاڭا ءداۋىرى باستالدى

استانا. قازاقپارات - بۇگىن استانادا حالىقارالىق قازاق كۇرەسى فەدەراتسياسىنىڭ قۇرىلتاي كونگرەسىندە قانات بوزىمبايەۆ قازاق كۇرەسىن دامىتۋدىڭ جوسپارلارىمەن ءبولىستى، دەپ حابارلايدى قازاقپارات.

«بۇل مەن ءۇشىن اسا ابىرويلى مىندەت بولىپ وتىر. سەنىمدەرىڭىزدى اقتاۋ ءۇشىن كۇش- جىگەرىمدى ايامايمىن. ەلىمىزدىڭ سپورتى ءۇشىن بۇگىن تاريحي كۇن. ءبىز ۇلتتىق سپورتىمىزدىڭ جاڭا حالىقارالىق ۇيىمىن قۇرىپ، ونىڭ قۇرىلتايلىق كونگرەسىن وتكىزۋدەمىز. استاناعا الەمنىڭ 35 مەملەكەتىنەن دەلەگاتتار كەلىپ وتىر. وسى ورايدا بۇگىننەن باستاپ قازاق كۇرەسىنىڭ جاڭا ءداۋىرى باستالدى دەپ ايتۋعا بولادى. ءبىزدىڭ باستامانى قولداعان سەرىكتەستەر كوپ. بۇرىن قازاق كۇرەسى اتاۋىن ەستىمەگەن ەلدەردىڭ وزىندە جاقىن بولاشاقتا وسى سپورت ءتۇرىنىڭ ۇيىرمەلەرى اشىلادى»، - دەدى قانات بوزىمبايەۆ.

بۇل رەتتە ول ءبىرقاتار الىس شەتەلدەردە قازاق كۇرەسىمەن اينالىساتىندار قاتارى ارتا تۇسەتىنىن جەتكىزدى.

«ەندى ۇلتتىق كۇرەسىمىزدى جاڭا دەڭگەيدە دامىتۋ ءۇشىن ءبىراز وزگەرىستەر جاسايتىن بولامىز. مەنىڭ ويىمشا، قازاق كۇرەسىنەن مىندەتتى تۇردە الەم چەمپيوناتىن ەكى جىلدا ءبىر رەت وتكىزۋ كەرەك. وسى ورايدا، ءتيىستى رەگلامەنتتى بەكىتەمىز. ءدال سول مەزگىلدە «الەم بارىسىن» وتكىزىپ، وعان الەم كۋبوگى مارتەبەسىن بەرۋ جوسپارى دا بار. ال ەگەر «ەۋرازيا بارىسىنا» توقتالساق، ونى ەۋرازيا كۋبوگىنا اينالدىرىپ جانە ازيا چەمپيوناتىن جىل سايىن ۇيىمداستىراتىن بولامىز»، - دەدى ح ق ك ف پرەزيدەنتى.

ونىڭ سوزىنە قاراعاندا، جاستار مەن بالالار اراسىندا جارىستار دا وسى فورماتتا وتكىزۋ جوسپارعا ەنگىزىلگەن.

«شەت ەلدەردەن باپكەرلەر مەن مامانداردى وسىندا شاقىرتىپ، كۇرەستىڭ بۇكىل قىر- سىرىنا ولاردى ۇيرەتىپ، شاكىرتاقى تولەۋگە تىرىساتىن بولامىز. بۇدان باسقا، شەت ەلدەردە قازاق كۇرەسى سپورت زالدارىن اشۋعا قارجىلاي كومەكتى قاراستىرماقپىز. سوندىقتان العا قويىلعان ماقساتتار از ەمەس. وسى ورايدا ىسكە بارشامىز جۇمىلا كىرىسەيىك دەگەن تىلەك بار»، - دەپ مالىمدەدى قانات بوزىمبايەۆ.

بۇدان بۇرىن حابارلانعانداي، بۇگىن استانادا حالىقارالىق قازاق كۇرەسى فەدەراتسياسىنىڭ قۇرىلتاي كونگرەسى ءوتىپ، وعان الەمنىڭ 35 ەلىنەن وكىلدەر قاتىستى. كونگرەسس كەزىندە فەدەراتسيانىڭ جارعىسى بەكىتىلىپ، وعان قوسا جاڭا ۇيىمنىڭ قازاق كۇرەسىن الداعى ءتورت جىلدا دامىتۋ جۇمىستارىنىڭ جوسپارى قابىلداندى. وندا ق ر ەنەرگەتيكا ءمينيسترى قانات بوزىمبايەۆ حالىقارالىق قازاق كۇرەسى فەدەراتسياسىنىڭ (ح ق ك ف) پرەزيدەنتى بولىپ سايلاندى. سونىمەن قاتار جيىن بارىسىندا ح ق ك ف- نىڭ 5 ۆيتسە- پرەزيدەنتى دە بەكىتىلدى.

اۆتور: رۋسلان عابباسوۆ