كوكساي شاتقالىندا قار كوشكىنى بولاتىندىعى ەسكەرتىلمەدى - قورعانىس ءمينيسترى
«الدىن الا تەكسەرۋ بارىسىندا قايعىلى وقيعانىڭ باستى سەبەبى جىلدىڭ بۇل مەزگىلىندە اتالعان شاتقالعا (كوكساي) ءتان ەمەس انومالدى اۋا رايى قۇبىلىسىمەن بايلانىستى ەكەندىگى انىقتالدى. جاۋىن- شاشىن بارىسىندا اۋا رايى كۇرت جىلىنىپ، سونىڭ سالدارىنان توسىننان قار كوشكىنى ورىن العان»، - دەدى مينيستر ۇكىمەتتىڭ سەلەكتورلىق رەجىمدەگى وتىرىسىندا.
سونىمەن قاتار ول قايعىلى جايتقا باسقا دا فاكتورلاردىڭ تۇرتكى بولعاندىعىن اتاپ ءوتتى.
«قازىر وقۋ- جاتتىعۋدى ۇيىمداستىرۋ، قاۋىپسىزدىك شارالارىن ساقتاۋ سىندى باعىتتاردا تەرگەۋ جۇرگىزىلۋدە. كوميسسيا قازا تاپقانداردىڭ وتباسىلارىنا كومەك كورسەتۋ جانە قولداۋ بويىنشا بارلىق ماسەلەلەردى قاراستىرۋدا. ءبىز گوسپيتالدە جاتقان اسكەر قىزمەتشىلەرگە بارىپ قايتتىق، ولاردىڭ جاعدايلارى قاناعاتتانارلىق. ولار دارىگەرلەر مەن پسيحولوگتاردىڭ قاداعالاۋىندا. اكىمدەر 4 وتباسىندا بولدى»، - دەدى جاسۇزاقوۆ.
سونىمەن قاتار مينيستر قايعىلى وقيعا ورىن العان كۇنى كوكساي شاتقالىندا قار كوشكىنى ءبولۋى مۇمكىن دەگەن اقپاراتتىڭ بولماعاندىعىن باسا ايتتى.
«بۇل ءبولىم ول جەردە جىل بويى تۇراقتاپ كەلەدى. ولار اتالعان شاتقالدا قىسى- جازى جاتتىعۋ وتكىزەدى. جالپى، بۇل ءبولىم تاۋلى جاعدايدا ارەكەت ەتۋگە ماشىقتانعان. بۇل ارنايى ماقساتتاعى تاۋلى جەرگە ارنالعان قورىقشىلار پولكى. توتەنشە جاعدايلار جانە «قازگيدرومەت» تاراپىنان قالىڭ جاۋىن- شاشىن تۇسەتىندىگى ەسكەرتىلدى. ءبىراق، كوشكىن قاۋپى جايىندا ەسكەرتۋ بولعان جوق. وڭتۇستىك قازاقستان وبلىسى بويىنشا بولدى. قازىر تەرگەۋ ورگاندارى ءمان- جايدى انىقتايدى دەپ ويلايمىن، ودان كەيىن وقيعانىڭ ءمان- جايى ايقىندالا تۇسەدى»، - دەدى جاسۇزاقوۆ.
اۆتور: مارلان جيەمباي
