قاراعاندىدا جالعان گاۋھار تاس كىسى ولىمىنە سەبەپ بولدى

قاراعاندى. قازاقپارات - اسىل تاس قاراعاندى تۇرعىنىنىڭ ولىمىنە سەبەپ بولدى، دەپ حابارلادى «قازاقپارات» ح ا ا ءتىلشىسى.

قاراعاندى وبلىسى قىلمىستىق ءىس جونىندەگى مامانداندىرىلعان اۋدانارالىق سوتى بۇزاقىلىعى، قارۋ ساقتاعانى جانە كىسى ولتىرگەنى ءۇشىن ايىپتالعان ءۇش ەر ادامنىڭ ءىسىن قاراۋدا. تەرگەۋ نۇسقاسى بويىنشا جانجالدىڭ شىعۋى مەن كىسى ولىمىنە جالعان گاۋھار تاس سەبەپ بولعان. «ءۇش ەر ادام ءبىرقاتار قىلمىس جاساعانى، ونىڭ ىشىندە كىسى ولتىرگەنى ءۇشىن ايىپتالۋدا»، - دەپ حابارلادى سوتتىڭ باسپا ءسوز قىزمەتىندە.

ايىپتاۋ اكتىسىنە سايكەس سوتتالۋشىلاردىڭ ءبىرى تانىسىنان گاۋھار تاس ساتىپ العان، ءبىراق ول جالعان بولىپ شىققان. ساتىپ العاننان كەيىن ەكى ايدان سوڭ ونىڭ جالعان ەكەنىن بىلگەن ول تانىسىمەن حابارلاسىپ، تاس ءۇشىن بەرگەن Range Rover، Toyota Land Cruiser 200 جانە Lexus RX 350 - ءۇش كولىكتى قايتارۋىن تالاپ ەتەدى.

الايدا بۇل ساتتە ەر ادام Lexus RX 350 كولىگىن ساتىپ ۇلگەرىپ، بەس مىڭ دوللار ءتۇسىمدى ءۇشىنشى ادامعا بەرىپ جىبەرگەن. جالعان بريلليانت الىپ الدانعان ەر ادام ەكى دوسىمەن ساتقان ادامنان اقشا الۋ ءۇشىن بارادى. ولاردىڭ اراسىندا اقتاس كوشەسىندە جانجال تۋىندايدى. سوتتالۋشىلاردىڭ ءبىرى ەر ادامعا وق اتقان، ءولىم اۋزىندا جاتقان ەر ادامدى كولىككە سالىپ، قاراعاندىداعى ماقاجانوۆ اتىنداعى ورتوپەديا جانە تراۆموتولوگيا ورتالىعىنىڭ شىعابەرىسىنە تاستاپ كەتەدى. ەر ادام ەسىن جيماستان كوز جۇمادى.