رينات مۋحين ازياداداعى جەڭىسىنەن كەيىنگى اسەرىمەن ءبولىستى - فوتو
«وزدەرىڭىز كورگەندەي، مەن ءوز مىقتىلىعىمدى دالەلدەدىم. بۇنىڭ بارلىعى قاجىرلى ەڭبەكتىڭ ناتيجەسى. مەن جارىسقا شىعار الدىندا ءسال قوبالجىعانىم راس. الايدا، قانداي جاعداي بولماسىن جەڭىسكە جەتۋىم كەرەك دەپ ويلادىم. اقىرى ويلاعانىم ورىندالدى. مىنە، ءبىرىنشى بولىپ ەل قورجىنىنا التىن جۇلدەنى سالدىم. بۇل باسقا سپورتشىلارىمىزعا دا دەمەۋ بولاتىنى ءسوزسىز. ماعان قولداۋ بىلدىرگەندەرىڭىزگە، سەنىم ارتقاندارىڭىزعا راحمەت»، - دەدى جارىستان كەيىن رينات مۋحين.
قازاقستان قۇراماسىنا العاشقى التىن مەدالدى سىيلاعان چەمپيونىمىز جەڭىسىنەن كەيىنگى اسەرىندە قولايسىز اۋا رايىنىڭ جەڭىسكە جەتۋىنە اسەر ەتپەگەنىن دە ايتتى، دەپ حابارلايدى ساپپورودان قازاقپارات ءتىلشىسى.
«بۇگىن مەن جارىسقا شىعاتىن كۇنى ساپپورونىڭ اۋا رايى توسىن مىنەز تانىتىپ، قارلى بورانعا باستى. ءبىراق، بۇل مەنىڭ جەڭىسكە جەتۋىمە كەرى اسەرىن تيگىزە المادى»، دەدى چەمپيون. بۇگىن ساپپورو قالاسىندا قاتتى جەل تۇرىپ، تۇنىمەن جاۋعان ۇلپا قار ۇشقىندارى كەيبىر سپورتشىلارعا قيىندىق اكەلىپ جاتقانى انىق. الايدا، ءبىزدىڭ شاڭعىشىمىز 15 شاقىرىمدىق قاشىقتىقتى اۋا رايىنىڭ قولايسىزدىعىنا قاراماستان ءبىرىنشى بولىپ باسىپ ءوتتى.
ەستەرىڭىزگە سالا كەتەيىك، كەشە ەلەنا كولومينا كۇمىس جۇلدەنى جەڭىپ السا، بۇگىن ول تاعى ءبىر قولانى ەل قورجىنىنا سالعان بولاتىن. بۇگىن قازاقستاندىق سپورتشىلار كەرلينگ، شاڭعى جارىستارى، ترامپليننەن سەكىرۋ، كونكي سپورتى، شورت- ترەك، شايبالى حوككەيدەن ونەر كورسەتىپ جاتىر.
كۇنسۇلتان وتارباي
