ديماش قۇدايبەرگەننىڭ شىرقاعان ءانى «ازيانىڭ جاڭا اندەرى» رەيتينگىنە كىردى
«قوڭىر كۇز» ءانى 2055 ۇپايمەن اپتالىق توپ-20 رەيتينگىندە 20 - ورىننان، جالپى رەيتينگتە 34 - ورىننان كورىندى. ال Uptown Funk ءانى 2986 ۇپاي جيناپ، جالپى رەيتينگتە 29 - ورىنعا جايعاستى. رەيتينگتى ديماشتىڭ قارسىلاسى چجان تسزە 137710 ۇپايمەن كوش باستاپ تۇر.
ايتا كەتەرلىگى، «ازيانىڭ جاڭا اندەرى» رەيتينگىنە ءبىر جولدا ءانشىنىڭ ءۇش ءانى كىرۋىنە مۇمكىندىك بار.
رەيتينگ ازيالىق انشىلەردىڭ قىتايداعى تانىمالدىلىعىنا بايلانىستى جاسالادى. وندا ءۇش ايدىڭ ىشىندەگى بارلىق ازيالىق انشىلەردىڭ قىتايداعى تىڭدالىمى، ءبولىسۋى جانە اقىلى تۇردە جۇكتەپ الۋى ارقىلى ۇپاي سانالىپ، رەيتينگ قۇرىلادى. رەيتينگ ءار 10 مينۋت سايىن جاڭالانىپ، جىل سوڭىندا جىلدىق توپ رەيتينگ جاريالانادى.
قىتايدى ءوز تالانتىمەن ءتانتى ەتكەن جەرلەسىمىز «Singer - 2017» جوباسىندا وسى ۋاقىتقا دەيىن بەس ءان ورىندادى. بۇعان دەيىن ديماش قىتايدىڭ مەرەكەلىك كونسەرتىندە قازاقتىڭ «وي جايلاۋ» ءانىن شىرقاعانىن حابارلاعان بولاتىنبىز.
ديماش قۇدايبەرگەن «Singer - 2017» جوباسىندا از ۋاقىتتىڭ ىشىندە قىتايداعى ەڭ ىقپالدى جۇلدىزداردىڭ بىرىنە اينالدى. ءوز ەلىندە وسىنشالىقتى تانىمال بولۋ ءۇشىن قىتايلىق جۇلدىزداردىڭ ءوزى قانشا جىلىن سارپ ەتكەنى ءمالىم. بۇل كۇندە قازاقستاندىق ءانشى 9 - قاڭتاردا اشقان Sina Weibo (تۋيتتەردىڭ بالاماسى) الەۋمەتتىك جەكە پاراقشاسىنا جازىلعان جانكۇيەرلەر سانى 2 ميلليوننان اسىپ كەتتى.
ەسكە سالا كەتەيىك، ديماش 25 - اقپان كۇنى بايقاۋدىڭ ءۇشىنشى اينالىمىن (التىنشى كەزەڭ) باستايدى. وتانداسىمىز لارا فابياننىڭ رەپەرتۋارىنان «Adagio» ءانىن ورىنداماق.
اۆتور: مۇحتار قاليموللا ۇلى
