ءجۇرسىن ەرمان: ايتىس پەن اراقتىڭ اراسىن اجىراتا الماي جۇرگەندەرگە وكىنەمىن
وسىعان بايلانىستى ءجۇرسىن ەرمان الداعى ۋاقىتتا تىكەلەي ەفيردە بولاتبەك پەن مۇحتاردىڭ اراسىندا ايتىس وتكىزەتىنىن ايتقان ەدى.
«بارىڭە!
اۋرۋحانادا جاتىرمىن. بىتەلىپ قالعان قان تامىرلارىما وتا جاساماقشى. وسىدان امان شىقسام ءبىر جوسپارىم بار:
التىن دومبىرا تۋرالى ءارتۇرلى اڭگىمە ايتىلدى عوي. انىعى اللاعا ايان. بولاتبەك پەن مۇحتاردىڭ اراسىندا ۋاقىتى شەكتەۋسىز جەكپە- جەك ايتىس وتكىزگىم كەلەدى. تىكەلەي ەفيردە. كورسەتىلىمدى قاي تەلەارنا موينىنا الا الادى؟ دەمەۋشى بولعىسى كەلەتىندەر بار ما؟ تورەلىكتى حالىق جاساسا قايتەر ەد؟ قانداي جولمەن؟
اقىل قوسىڭدار. پىكىر ايتىڭدار. سىرتتان سىناي بەرۋ وڭاي عوي. ىشىندە بولىڭدار. ۇلت ونەرىنە شىن جاناشىر بولساڭدار سوڭىنان جۇدىرىق بىلەپ اركىمدى عايباتتاعانشا قازىر كومەككە كەلىڭدەر.
جوبانى جۇزەگە اسىرۋ ءۇشىن مەن ءولىپ قالماۋىم كەرەك، دۇعالارىڭا قوسا جۇرىڭىزدەرشى» - دەپ جازعان بولاتىن ءجۇرسىن ەرمان ءوزىنىڭ فەيزبۋكتاعى پاراقشاسىندا.
بۇگىن ءجۇرسىن اعامىزعا حابارلاستىم. اللاعا شۇكىر، اۋرۋحانادان شىعىپتى. دەنساۋلىعى دا قالىپىنا كەلىپ قالعان ەكەن. مۇحتار مەن بولاتبەكتىڭ اراسىندا وتكىزۋگە جوسپارلاعان ايتىس جايىن سۇرادىم.
«ءالى دايىن بولماي جاتىر. قاي تەلەارنادان وتكىزەتىنىمىز دە ناقتى شەشىلگەن جوق. دەمەۋشىلەر دە بولماي تۇر» - دەيدى اعامىز.
وسىندايدا حالىق كوكەيىندەگى، ۇلتتىق رۋحىمىزدى كوتەرۋدەگى، قالا بەردى كورەرمەن كوڭىلىندەگى كىربىڭدى تارقاتۋ ءۇشىن مۇحتار مەن بولاتبەكتىڭ ءسوز بارىمتاسىن تىكەلەي ەفيردەن كورسەتەتىن ءبىر وتاندىق ارنا شىقپاعانىنا قىنجىلادى ەكەنسىڭ.
ايتپاقشى، ايتىسقا قاتىستى تاعى ءبىر جايدى ايتا كەتكىم كەلەدى.
ءجۇرسىن ەرماننىڭ ينستاگرام پاراقشاسىنا gulmiraaitore ەسىمدى قولدانۋشى «اعا قاينار الاگوزوۆ دەگەن اقىن «ايتىسقا ءجۇرسىن اعا شىعارمايدى» دەيدى، سول راس پا؟ » - دەپ ساۋال جولداعان ەكەن.
وعان ايتىس جاناشىرى: «قايناردى شىعارماي جۇرگەنىم راس. ايان سەيىتوۆتىڭ دە الدى جابىق تۇر. اراق پەن ايتىستىڭ اراسىن اشىپ الماي، سونداي تالانتتى قور ەتىپ جۇرگەنىنە وكىنەمىن. بيىل اقتوبەدە ءۇش ايتىس بار. دەنى ساۋ تالانتتارعا توسقاۋىل جوق» - دەپ جاۋاپ بەرىپتى.
baq.kz
