جۋرناليستەر مينيسترلەردىڭ ارتىنان جۇگىرمەسە دە بولادى
ەندى، اتالعان قىزمەتتىڭ رەسمي وكىلى مۇرات جۇمانبايدىڭ ەل وقيعالارىنا قاتىستى بايانداماسىنان كەيىن ءاربىر مينيسترلىكتىڭ باسپا ءسوز حاتشىلارى جۋرناليستەردىڭ كوكەيىندە جۇرگەن سۇراقتارعا جاۋاپ بەرەتىن بولادى، دەپ حابارلايدى قازاقپارات ءتىلشىسى.
بۇگىنگى بريفينگكە ىشكى ىستەر مينيسترلىگى، ءدىن جانە ازاماتتىق قوعام ىستەرى جونىندەگى مينيسترلىك، ءبىلىم جانە عىلىم مينيسترلىگى، سونداي-اق سىرتقى ىستەر مينيسترلىگىنىڭ باسپا ءسوز حاتشىلارى كەلمەدى. دەگەنمەن، باسپا ءسوز ءماسليحاتىنا قاتىسقان حاتشىلاردىڭ دايىندىعى ءتيىستى دەڭگەيدە بولعان جوق. سەبەبى جۋرناليستەر ولاردىڭ جاۋاپتارىنان تۇشىمدى اقپارات شىعارا المادى. ماسەلەن، قورعانىس مينيسترلىگىنىڭ اقپارات جانە كوممۋنيكاتسيالار دەپارتامەنتى باسشىسىنىڭ ورىنباسارى قايىرگەلدى قۇسايىنوۆ قار كوشكىنى كەزىندە ساربازداردىڭ قايتىس بولۋىنا بايلانىستى تەرگەۋدىڭ بارىسى جايىندا ايتىپ بەردى.
«شىنى كەرەك، بۇل - ۇلكەن تراگەديا. مەنىڭشە، كوميسسياعا ەنگەن ادامداردىڭ بارلىعى بىلىكتى ماماندار. قازىرگى كەزدە الدىن الا ەشتەڭە ايتا المايمىن. كوميسسيانىڭ ءوزى ءتيىستى باعاسىن بەرەدى»، - دەدى قۇسايىنوۆ.
سونداي-اق ول كولىكتى ماس كۇيىدە جۇرگىزگەن اسكەري پوليتسيا قىزمەتكەرىنىڭ جۇمىستان قۋىلعانىن جەتكىزدى. وسىدان كەيىن ەنەرگەتيكا مينيسترلىگىنىڭ، سونداي- اق مادەنيەت جانە سپورت مينيسترلىگىنىڭ وكىلىنە سۇراق قويىلدى. الايدا ەكى ۆەدومستۆونىڭ وكىلدەرى اتالعان سۇراقتاردىڭ كەيىن جاۋاپ بەرۋدى سۇرادى.
«ءبىزدىڭ نەگىزگى ماقساتىمىز - تولىققاندى اقپارات بەرۋ. جۋرناليستەر مينيسترلەردىڭ ارتىنان جۇگىرمەيتىندەي، كوكەيلەرىندە جۇرگەن سۇراقتارعا وسى جەردەن بىردەن جاۋاپ الاتىنداي بريفينگتەردى وسى فورماتتا وتكىزۋدى قولعا الىپ وتىرمىز. ەندى، ءاربىر دۇيسەنبى سايىن باسپا ءسوز حاتشىلارى وسىندا كەلىپ، بارلىق سۇراقتارعا جاۋاپ بەرەتىن بولادى. ۆەدومستۆونىڭ باسپا ءسوز حاتشىسى مەن رەسمي وكىلى قىزمەتتەرى سول ءۇشىن ەنگىزىلگەن. ولار وزدەرى جۇمىس ىستەيتىن مەملەكەتتىك ورگاننىڭ رەسمي ۇستانىمىن ءبىلدىرۋى ءتيىس. بۇگىن دايىندىقتارى دۇرىس بولمادى. كەلەسى جولى باسپا ءسوز حاتشىلارىنان دايىندالىپ كەلۋدى سۇرايمىن»، - دەدى مۇرات جۇمانباي.
ونىڭ ايتۋىنشا، ۇلتتىق قاۋىپسىزدىك كوميتەتى مەن باس پروكۋراتۋرانىڭ باسپا ءسوز حاتشىلارىنا ءتيىستى شاقىرۋ جىبەرىلەدى. الايدا ولاردىڭ جاڭا فورماتتاعى بريفينگتەرگە قاتىسۋى- قاتىسپاۋى ءالى بەلگىسىز.
اۆتور: ارمان اسقاروۆ
