جۋرناليستەردىڭ ەكونوميكالىق ءبىلىمىن كوتەرۋ كەرەك - مينيستر ساعاديەۆ

استانا. قازاقپارات - ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، مەملەكەت باسشىسىنىڭ ءۇشىنشى جاڭعىرۋعا ارنالعان بيىلعى جولداۋى اياسىندا جۋرناليست مامانداردىڭ ەكونوميكالىق ءبىلىمىن كۇشەيتۋ كەرەك، دەپ حابارلايدى قازاقپارات ءتىلشىسى.

«ارينە، جۋرناليستەردىڭ ەكونوميكالىق ءبىلىمىن كوتەرۋ كەرەك. سەبەبى بيىلعى جولداۋ اياسىنداعى بارلىق شارالاردى حالىققا تۇسىنىكتى تىلدە جەتكىزگەن اسا ماڭىزدى. ول - ءبىر. ەكىنشىدەن، قاراپايىم حالىقتىڭ ەكونوميكانى جاقسى بىلگەنى سول ەكونوميكانىڭ وزىنە دە پايدالى. سوندىقتان بۇقارالىق اقپارات قۇرالدارى سالاسىنداعى مامانداردىڭ ەكونوميكا بويىنشا ارنايى بىلىمدەرىن كۇشەيتكەن ءجون»، - دەدى ساعاديەۆ قازاقپارات تىلشىسىنە بەرگەن سۇحباتىندا.

ال «جۋرناليستەردى دايارلاۋ جاعىنان قانداي دا ءبىر وزگەرىس بولا ما؟» دەگەن سۇراققا مينيستر: «ارينە، ارينە. ولارعا ارنايى كۋرستاردى ەنگىزەمىز. سوسىن بىزدە اكادەميالىق ەركىندىك اياسىندا جوعارى وقۋ ورىندارىنا وقۋ باعدارلامالارىن وزگەرتۋگە مۇمكىندىك بەرىلەدى. ولار وزدىگىمەن مامان دايارلاۋ جۇيەسىن تۇزەتە الادى»، - دەپ جاۋاپ بەردى.

ايتا كەتەيىك، ق ر اقپارات جانە كوممۋنيكاتسيالار مينيسترلىگىنىڭ كەڭەتىلگەن القا ماجىلىسىندە مينيستر داۋرەن ابايەۆ تا ساراپتامالىق جۋرناليستيكانى دامىتۋ ماسەلەسىنە باسا نازار اۋدارعان بولاتىن. سەبەبى قازاقستاندىقتار تەلە- راديو سالاسىندا كاسىبي جۋرناليستەردىڭ تاپشىلىعى ماسەلەسىن ءجيى كوتەرەدى. ال باسپا سوزدە ساراپتامالىق ماتەريالدار از.

«ۇستىمىزدەگى جىلى مەملەكەتتىك اقپارات قۇرالدارى الدىندا ءبىرقاتار مىندەتتەر تۇر. ەڭ الدىمەن ساراپتاماعا، تالداۋ ماتەريالدارىنا كوپتەپ كوڭىل ءبولۋ كەرەك. ويتكەنى بۇگىنگى تاڭدا اقپارات وتە تەز تاراتىلادى. سوندىقتان سول اقپاراتتاردىڭ مازمۇنى مەن ساپاسى ساي بولۋى ءتيىس»، - دەپ اتاپ كورسەتتى ابايەۆ.