مەكتەپ وقۋشىسى ءورتتى دىبىسپەن ءوشىرۋ قۇرىلعىسىن قۇراستىردى

استانا. قازاقپارات - اتىراۋ قالاسىنداعى نازاربايەۆ زياتكەرلىك مەكتەبىنىڭ وقۋشىسى اباي لوران المۇحامبەتوۆ وتتى دىبىسپەن وشىرەتىن قۇرىلعىنى قۇراستىرىپ شىقتى، دەپ حابارلايدى قازاقپارات ءتىلشىسى.

«مەن جوعارى امپليتۋدالى دىبىس تولقىندارى ارقىلى ءورتتى سوندىرە الامىن. وسى قۇرىلعىنىڭ ەرەكشەلىگى سول، دىبىس تولقىندارى ءورتتىڭ اينالاسىنداعى اۋانى تارىلتىپ، وتتەگىنى ازايتادى. ال وتتەگى بولماسا، وت جانا المايدى»، - دەدى اباي لوران قازاقپارات تىلشىسىنە بەرگەن سۇحباتىندا.

اتىراۋلىق وقۋشى ءوز جوباسىن «ۇلى دالا مۇراگەرلەرى» اتتى كورمە اياسىندا تانىستىردى. ول جەردە نازاربايەۆ زياتكەرلىك مەكتەپتەرىنىڭ جەتىستىكتەرى العاش رەت كورسەتىلدى. كورمە اياسىندا ۇلتتىق قولونەر، كوركەمسۋرەت، گوبەلەن، پاننو جانە تاعى باسقا قولدانبالى ونەر سالاسىنداعى مەكتەپ وقۋشىلارىنىڭ ءوز قولىمەن جاساعان بۇيىمدارى، سونداي- اق روبوتوتەحنيكا، عارىش، مۇناي- گاز، ينفراقۇرىلىم جانە وڭدەۋ ونەركاسىبى بويىنشا ويلاپ تاپقان جوبالارى تانىستىرىلدى. شارا اياسىندا مۇعالىمدەرگە ارنالعان شەبەرلىك ساباقتارى دا ۇيىمداستىرىلدى. ماسەلەن، اتىراۋ قالاسىنداعى نازاربايەۆ زياتكەرلىك مەكتەبىنىڭ تاعى ءبىر وقۋشىسى ءساتتىعالي جولداسباي ءوز اتاسىنا «اقىلدى تاقيانى» جاساپ بەردى. ال سەمەيدەگى نازاربايەۆ زياتكەرلىك مەكتەبىنىڭ وقۋشىسى ءادىل وردايەۆ ءوزىنىڭ روبوتتاردى «قارا جورعاعا» بيلەتكىزىپ قويدى.

 ايتا كەتەيىك، ءورتتى دىبىسپەن ءوشىرۋ تەحنولوگياسىن وسىدان ەكى جىل بۇرىن ا ق ش- تىڭ دجوردج مەيسون اتىنداعى ۋنيۆەرسيتەتتىڭ ستۋدەنتتەرى دە تانىستىرعان. ولار وسى ەلدىڭ قورعانىس سالاسىنداعى عىلىمي- زەرتتەۋ اگەنتتىگىنىڭ (DARPA) بەينەبايانىن نەگىزگە الدى.

اۆتور: ارمان اسقاروۆ