قازاقستانداعى ەڭ ارزان دارىگەر قاي ايماقتا؟
ال قازىر اۋرۋحانا تابالدىرىعىن اتتاۋ ورتا ەسەپپەن 2146 تەڭگە تۇرادى. بۇل تۋرالى ك ت ك حابارلايدى.
بۇل مالىمەتتەردى Energyprom ساراپشىلارى ۇسىنىپ وتىر. ولار ەلىمىزدەگى دەنساۋلىق ساقتاۋ قىزمەتى قۇنىن ەسەپتەپ وسىنداي بايلامعا كەلگەن.
دەنساۋلىق ساقتاۋ سالاسىنداعى كورسەتەتىن قىزمەت قۇنى كۇيىپ تۇرعان قالالار كوشىن ەلىمىزدە الماتى باستايدى. ودان كەيىنگى ورىنداردى اتىراۋ مەن استانا بولىسكەن.
الماتىدا دارىگەرگە ءبىر كىرىپ شىعۋ ءۇشىن 3800 تەڭگەگە شىعىندالاسىڭ. اتىراۋدا بۇل 3500 تەڭگە. ال استانالىقتار ءۇشىن ءسال-ءپال ارزانداۋ، ياعني، 2800 تەڭگەسىن جۇمسايدى.
ال ەڭ دۇرىسى قاراعاندى نەمەسە سەمەيگە بارىپ ەمدەلۋ. ول جاقتا مىڭ جارىم تەڭگە تولەپ ءبىراز كەڭەس الۋعا بولادى. جانە بۇل رەسپۋبليكا بويىنشا ەڭ تومەنگى باعا.
ۋلترا دىبىستىق باقىلاۋ دياگنوستيكاسى دا 14 پايىزعا، اناليزدەر 11 پايىزعا قىمباتتاعان.
ءدارى- دارمەككە قاتىستى رەسمي ستاتيستيكا جوقتىڭ قاسى. قازىرگى تاڭدا تەك سىرتتان اكەلىنەتىن دارىلەر عانا ەمەس، ءوزىمىزدىڭ مەديتسينالىق ونىمدەر دە قىمباتتاپ جاتىر.
«كوپتەگەن پرەپاراتتاردىڭ بىزدە ءتۇپنۇسقاسى جوق. ياعني ولار بۇكىل الەم بويىنشا پاتەنتتىك قورعاۋدا تۇر. ونداي قىمبات پرەپاراتتاردى ءبىز ءوز ازاماتتارىمىز ءۇشىن ساتىپ الامىز. ال نەگىزىندە وسىنداي قاجەتتى ءارى باعالى ءدارى- دارمەكتەر مەن مەديتسينالىق زاتتاردى وزىمىزدە ءوندىرىپ شىعارۋ ءۇشىن بارىمىزدى سالىپ جاتىرمىز»، - دەيدى دەنساۋلىق ساقتاۋ ءمينيسترى ەلجان ءبىرتانوۆ.
ال بيىلعى جىلدىڭ 1 -شىلدەسىنەن باستاپ بارلىق دارىلەرگە قويىلاتىن باعا قاتاڭ زاڭ جۇزىندە قاداعالانباق.
