ا ق ش- تا قانات يسلام مەن روبسون اسسيس اراسىنداعى جەكپە-جەك باستالدى
كەزدەسۋ 10 راۋندقا سوزىلادى.
بوكسشىلاردىڭ كەزدەسۋى كىشى روي- دجونستىڭ بوكس كەشىنىڭ اياسىندا وتۋدە. بۇل الەمگە «قازاق» دەگەن اتپەن تانىلعان قانات يسلامنىڭ كاسىپقوي رينگتەگى 23- كەزدەسۋى. قانات وسىعان دەيىن 22 كەزدەسۋىندە جەڭىسكە جەتىپ، ونىڭ 18 ىن نوكاۋتپەن اياقتاعان.
ال، روبسون كاسىپقوي رينگتە 19 كەزدەسۋىنىڭ 16 ىن جەڭىپ، 9 جەكپە- جەگىندە قارسىلاسىن مەرزىمىنەن بۇرىن ۇتىپ، ۇشەۋىندە جەڭىلىسكە ۇشىراعان. قانات يسلام 1984 -جىلدىڭ 13 -قىركۇيەگىندە قىتايدا دۇنيەگە كەلىپ، قازاقستانعا 2010 -جىلدارى كوشىپ كەلگەن. بۇعان دەيىن اۋەسقوي بوكستا قىتايدان بەيجىڭ وليمپياداسىنا قاتىسىپ، قولا مەدالعا يە بولعان. كاسىپقوي بوكسپەن 2012 -جىلدان بەرى اينالىسىپ كەلەدى.
ماتچ الدىندا وتكەن باسپا ءسوز ءماسليحاتىندا قانات يسلام بۇل ايقاسقا تولىق دايىن ەكەندىگىن ءمالىم ەتتى. «بۇگىن بارلىعىن، ناعىز چەمپيوندى كورگەنىم ءۇشىن قۋانىشتىمىن. مەن - WBA رەيتينگىندە ءتورتىنشىمىن، WBO- دا بەسىنشى ورىندامىن، وليمپيادا ويىندارىنىڭ قولا جۇلدەگەرىمىن. مەن ۇلكەن ايقاسقا دايىنمىن، جاتپاي- تۇرماي جاتتىعىپ جاتىرمىن. مەنىمەن وتباسىم، كوماندام - مەنەدجەر، باپكەر، پروموۋتەرىم بىرگە. بۇل جەكپە- جەكتىڭ وتەتىنىنە وتە قاتتى قۋانىشتىمىن. ۇلكەن ايقاسقا دايىنمىن»، - دەدى يسلام باسپا ءسوز ءماسليحاتىندا. سالماق ولشەۋ ناتيجەسى بويىنشا، يسلامنىڭ سالماعى 154,2 فۋنت (69,94 كەلى)، ال اسسيستىڭ سالماعى 154,6 فۋنت (70,12 كەلى) بولدى.
ەسكە سالايىق، قانات يسلامنىڭ روبسون اسسيسپەن جەكپە-جەگىن «قازاقستان» مەن «Kazsport» تەلەارنالارى تىكەلەي ەفيردە كورسەتۋدە.
اۆتور: جاسۇلان جولدىبايەۆ
