قاراماعىنداعى قىزمەتشىلەرىنىڭ زاڭسىز ارەكەتىن جاسىرماق بولعان پوليتسيا پودپولكوۆنيكتەرى سوتتالدى

استانا. قازاقپارات - قاراماعىنداعى قىزمەتشىلەرىنىڭ زاڭسىز ارەكەتىن جاسىرماق بولعان پوليتسيا پودپولكوۆنيكتەرى سوتتالدى. بۇل جايىندا قازاقپارات قوستاناي وبلىستىق سوتىنىڭ باسپا ءسوز قىزمەتىنە سىلتەمە جاساپ حابارلايدى.

تاراتىلعان اقپاراتقا سايكەس، بۇگىن قوستاناي وبلىسىنىڭ قارابالىق اۋداندىق سوتى ق ر ق ك 362-بابى 4-بولىگى 3-تارماعى جانە 422-بابى 1-بولىگى بويىنشا (بيلىكتى نەمەسە لاۋازىمدىق وكىلەتتىكتەردى اسىرا پايدالانۋ، جالعان ايعاقتار بەرۋدى پاراعا ساتىپ الۋ) ايىپتالعان قارابالىق اۋداندىق ءى ءى ب باسشىسىنىڭ ورىنباسارلارى امانتاي اعايداروۆ پەن جانگەلدى اكىنوۆقا قاتىستى قىلمىستىق ءىس بويىنشا سوت ۇكىمىن شىعاردى.

ءىس ماتەريالدارىنا سايكەس 2016 -جىلدىڭ 14 - ساۋىرىندە ەسەنكول اۋىلدىق وكرۋگىنىڭ لەسنوە اۋىلىندا بولعان ايىپتالۋشىلار ءوز قاراماعىندا جۇمىس ىستەيتىن ءتارتىپ ساقشىلارى سارسەنبايەۆ پەن تولەگەنوۆتىڭ زاڭسىز ارەكەتتەرىن جاسىرىپ، ولاردى قىلمىستىق جاۋاپكەرشىلىكتەن باساتپاق بولعان. وسى ماقساتتا اعايداروۆ پەن اكىنوۆ شاعىمدانۋشى ل. دوروشەنكوعا جانە ونىڭ اناسىنا  100000 تەڭگە ۇسىنىپ، ولاردان پوليتسيا قىزمەتكەرلەرىنە قاتىستى ايعاقتارىن وزگەرتۋدى سۇراعان.

 ەسكە سالساق، 2016 -جىلدىڭ 16 - قاراشاسىندا ن. سارسەنبايەۆ پەن ا. تولەگەنوۆكە ادامدى ازاپتادى دەگەن ايىپ تاعىلعان ەدى. سوت ۇكىمىمەن سارسەنبايەۆ جالپى تارتىپتەگى كولونياعا 3,5 جىلعا، ال تولەگەنوۆ 3 جىلعا باس بوستاندىقتارىنان ايىرۋ جازاسىنا تارتىلعان بولاتىن.

سوت ۇكىمىمەن ا. اعايداروۆ پەن ج. اكىنوۆ قىلمىستىق ىستە ايىپتى دەپ تانىلدى. ولارعا جالپى تارتىپتەگى كولونياعا 3 جىل 9 اي باس بوستاندىقتارىنان ايىرۋ جانە ءومىر بويىنا قۇقىق قورعاۋ ورگاندارى مەن مەملەكەتتىك قىزمەتتە بيلىك وكىلى رەتىندە جۇمىس ىستەۋ قۇقىعىنان ايىرۋ جازاسى تاعايىندالدى. ولار پوليتسيا پودپولكوۆنيگى ارنايى شەندەرىنەن ايىرىلىپ، سوت زالىندا تۇتقىندالدى. سوت ۇكىمى زاڭدى كۇشىنە ەنگەن جوق.

اۆتور: مارلان جيەمباي