قازاقستاندىق ايەلى بار سيريا ازاماتى ەلدەن شىعارىلمايدى
بۇل جايىندا قاراعاندى قالاسى قازىبەك بي اۋدانى №2 اۋداندىق سوتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
تاراتىلعان مالىمەتكە سايكەس، بۇقارالىق اقپارات قۇرالدارىندا سيريا ازاماتى ياسەر الەزالدين مەن ونىڭ وتباسىنا قاتىستى ماتەريال جاريالانعان. اتالعان ماتەريالدا سوت ياسەر الەزالديننىڭ وتباسىنا بوسقىن مارتەبەسىن بەرۋدەن باس تارتقاندىعى، يتەرناتسيونال وتباسى قازاقستاندا قالۋعا رۇقسات الۋى ءۇشىن جانتالاسىپ جۇرگەندىگى ايتىلعان.
«بۇقارالىق اقپارات قۇرالدارى اتالعان فاكتىگە بايلانىستى قوعامدىق پىكىردى ورشىتەتىن قاتە اقپارات جاريالاعان. وسىعان وراي قاراعاندى قالاسى قازىبەك بي اۋدانى №2 اۋداندىق سوتىنىڭ باسپا ءسوز قىزمەتى ياسەر الەزالديننىڭ سوتقا «قاراعاندى وبلىستىق ىشكى ىستەر دەپارتامەنتى» م ب كوشى- قون پوليتسياسى باسقارماسىنىڭ بوسقىن مارتەبەسىن بەرۋدەن باس تارتۋ شەشىمىنە داۋلاسىپ، شاعىم تۇسىرگەن. 2016 -جىلعى 13- مامىردا سوت شەشىمىمەن شاعىمدانۋشىنىڭ تالابىن قاناعاتتاندىرۋدان باس تارتىلعان. مۇنداي شەشىممەن 2016 -جىلدىڭ 1 -تامىزىندا قاراعاندى وبلىستىق سوتىنىڭ اپەللياتسيالىق ساتىسى دا كەلىسىپ، سوت شەشىمىن وزگەرىسسىز قالدىرعان. شىعارىلعان سوت شەشىمى شاعىمدانۋشىنى قازاقستان رەسپۋبليكاسى اۋماعىنان شىعارىپ جىبەرۋگە تۇرتكى بولمايدى. سونىمەن قاتار ونىڭ قازاقستان رەسپۋبليكاسىندا تۇرۋ قۇقىعىن شەكتەمەيدى»، - دەلىنگەن اۋداندىق سوت اقپاراتىندا.
مۇنان بولەك، تاراتىلعان اقپاراتتا شاعىمدانۋشىنىڭ ءوز ەلىنە قايتا ورالعىسى كەلمەيتىندىگى جانە جۇبايىنىڭ قازاقستان ازاماتشاسى ەكەندىگى اتاپ ءوتىلىپ، وسىعان سايكەس ونىڭ قازاقستان اۋماعىنا كەلۋ جانە تۇرۋ قۇقىعىن راسىمدەۋگە مۇمكىنشىلىگى بار ەكەندىگىنە باسا نازار اۋدارتقان.
ايتا كەتەيىك، بۇقارالىق اقپارات قۇرالدارىندا سيريا ازاماتى ياسەر الەزالدين 18 جاستاعى ۇلكەن ۇلىمەن ەلدەن دەپورتاتسيالانۋى مۇمكىن ەكەندىگى، ال ونىڭ جۇبايى قازاقستان ازاماتشاسى بولعاندىقتان، وعان دەپورتاتسيا قاراستىرىلمايتىندىعىن جاريا ەتىلگەن بولاتىن. سونداي- اق ونىڭ كامەلەتكە تولماعان ءتورت بالاسىنا ەلدەن شىعارۋ شارالارى قولدانىلمايتىندىعى اتاپ وتىلگەن ەدى.
اۆتور: مارلان جيەمباي
