قازاق مۋزىكاسى قىتايلىق « بايىرعى اۋەن» جوباسىندا شىرقالۋدا جانە حالىقارالىق سىيلىقتان ءۇمىتتى - فوتو، كەسكىن

بەيجىڭ. قازاقپارات - «قازاقپارات» ح ا ا قىتايدا ءوتىپ جاتقان مۋزىكالىق جوبالاردىڭ ءتۇسىرىلىم الاڭدارىندا قازاق انشىلەرىنىڭ جەتىستىكتەرىن كوپشىلىك نازارىنا ۇسىنادى.

وسى ورايدا «Best World Music Album at Grammys» امەريكالىق دىبىس جازۋ اكادەمياسىنىڭ سىيلىعىن الۋعا ءۇمىتتى تالانت جايىندا ماتەريالدى دايىنداپ وتىرمىز.

قازاقستاندىق ءانشى ديماش قۇدايبەرگەن قىتايداعى «Singer» كاسىبي ورىنداۋشىلار بايقاۋىندا جوعارى دەڭگەيدە ونەر كورسەتىپ جاتقانى كوپشىلىككە ايان.

سونىمەن قاتار وسى كۇندەرى ونىڭ دوسى ءارى مۋزىكالىق كەڭەسشىسى اراي ايدارحان «Singer» ءتۇسىرىلىمى اراسىنداعى ۇزىلىستەر كەزىندە تاعى ءبىر «Sounds of Naturە» (بايىرعى اۋەن) اتتى ءىرى جوبادا كورەرمەندەر قوشەمەتىنە يە بولۋدا.

ا. ايدارحان بۇگىندە قىتايدا تانىمال قازاق مۋزىكانتى ەكەنى ايتپاسا دا بەلگىلى.





16 -اقپاندا بەيجىڭدە وڭتۇستىك شىعىس سپۋتنيكتىك تەلەارناسى ءۇشىن (فۋجيان پروۆينسياسى) وسى بايقاۋدىڭ ءتورتىنشى كەزەڭى ءتۇسىرىلىپ، اراي ايدارحاننىڭ شاقىرۋىمەن وندا قازاقستاندىق ەتنيكالىق مۋزىكانىڭ «روكسوناكي» روك-توبى دا قاتىستى. وسى جولى «تەرمە» جانە «باقسىنىڭ بۇلت شاقىرۋى» كومپوزيتسيالارى ورىندالدى، ال ونىڭ الدىنداعى كەزەڭدەردە «سامال تاۋ»، «اجە» تۋىندىلارى شىرقالدى.

«تابيعات اۋەنى» بايقاۋى فولك- مۋزىكا ورىنداۋشىلارى اراسىندا وتكىزىلىپ، فۋجيان پروۆينسياسى سپۋتنيكتىك تەلەارنالارىمەن تارالادى. بايقاۋدىڭ اقتىق سىنى ساۋىردە بولادى. ۇزدىك دەپ تانىلعان ءۇش قاتىسۋشىنىڭ اندەرى ىرىكتەلىپ، «Best World Music Album at Grammys»  امەريكالىق دىبىس جازۋ اكادەمياسىنىڭ سىيلىعىنىڭ قاراۋىنا جىبەرىلەدى.

اراي ايدارحان «قازاقپارات» اگەنتتىگىنە بەرگەن سۇحباتىندا سوڭعى جىلداردا ءىرى ۆوكالدى شوۋ- جوبالاردا قازاقتىڭ ۇلتتىق مۋزىكاسى قىتايلىق قوعامداستىقتا كەڭىنەن قىزىعۋشىلىققا يە بولىپ وتىرعاندىعىن ايتتى.

«ءبىرىنشى كەزەكتە، ءبىز مۋزىكا ارقىلى جالپى قازاق مادەنيەتىن قىتاي سەكىلدى ۇلكەن ەلدە كەڭىنەن تاراتۋدامىز جانە بۇل قۋانتارلىق جاعداي دەپ بىلەمىن. وسى بايقاۋدا «Grammy» سىيلىعىنا ۇمىتكەر بولاتىن ۇزدىك ەتنيكالىق اندەر ىرىكتەلەدى. بۇل كەزەڭدە ءوزىمنىڭ سۇيىكتى توبىم «روكسوناكيدى» روك- ن- رولل ستيلىندە قازاقتىڭ مۋزىكالىق كومپوزيتسيالارىن بىرلەسە ورىنداۋدى ءوتىندىم»، - دەدى ول.

ءوز كەزەگىندە «روكسوناكي» توبىنىڭ ورىنداۋشىلارى رۋسلان قارا مەن عالىمجان سەكەيەۆ 19 اقپاندا بەيجىڭنىڭ «Mao Live Housە» اتتى تانىمال روك- الاڭىندا جەكە كونسەرت بەرەتىندىكتەرىن حابارلادى. «تابيعات اۋەندەرى» بايقاۋىندا ق ح ر- دا موڭعول ەتنوسىنىڭ وكىلى سىسين گەجيلە وسى ەلدە قازاق انشىلەرىنىڭ تانىمالدىعى ءوسىپ كەلە جاتقانىن اتاپ ءوتتى.

«قىتايدا قازاق انشىلەرىنىڭ تانىمالدىعى ءوسىپ كەلەدى. وسى جوبادا ارايمەن بىرگە قاتىسىپ وتىرعانىما قۋانىشتىمىن، سەبەبى ول وتە مىقتى مۋزىكانتشى»، - دەدى ول.

ەستەرىڭىزگە سالا كەتەيىك، 26 جاستاعى اراي ايدارحان «سhinese Idol» (2013 -جىل) جانە «China Is Listening» (2014 -جىل) بايقاۋلارىندا ۇزدىك ورىنداۋشىلاردىڭ بەستىگىنە ەنگەن ەدى.

ول «كومپوزيتور» ماماندىعى بويىنشا بەيجىڭدىك مۋزىكالىق مەكتەپتى ءتامامداعان بولاتىن. بىرنەشە ءاننىڭ اۆتورى، سونىمەن قاتار پروديۋسەرلىك قىرلارىمەن تانىمال. 13 جاستاعى دانيار تولقىن ۇلى ەسىمدى شاكىرتى «بالالار مۋزىكاسى» اتتى قىتايلىق تەلەۆيزيالىق جوباسىندا «اتامەكەن-اي» انىمەن كورەرمەندەر سۇيىسپەنشىلىگىنە يە بولدى. اراي ايدارحان سونىمەن قاتار مۋزىكالىق «اي» قىزدار توبىنا جەتەكشىلىك ەتىپ كەلەدى. 2016 -جىلدىڭ جازىندا ول قىتاي قازاقتارىنىڭ ءان فەستيۆالىن وتكىزۋدى ۇيىمداستىرىپ، وسى شاراعا قازاقستاننان دا انشىلەر شاقىرىلدى.

اۆتور: رۋسلان عابباسوۆ