كەزەكتە تۇرعان ازاماتتار دايىن كوتتەدجدەرگە كىرە الادى - «نۇرلى جەر» باعدارلاماسى

استانا. قازاقپارات - «نۇرلى جەر» مەملەكەتتىك باعدارلاماسى اياسىندا وبلىس ورتالىقتارى جانىنان بىركەلكى كوتتەدج قالاشىقتارىن سالىپ، تۇرعىن ءۇي كەزەگىندە تۇرعان ازاماتتارعا تاراتۋ جوسپارلانىپ وتىر.

الايدا، ونداي ۇيلەر تەگىن بەرىلمەيدى، دەپ حابارلايدى قازاقپارات ءتىلشىسى. «بۇگىندە رەسپۋبليكا بويىنشا 1,3 ميلليون ادام جەر كەزەگىندە تۇر. ەندى قاراڭىز، قازاقتىڭ ۇيىندە بالا كوپ قوي. اسىرەسە، وڭتۇستىك ايماقتاردا بەس- التى بالاسى بارلار جەتەرلىك. سولاردىڭ بارلىعىن كەزەككە قويىپ قويادى.

الايدا، بارىنە بەرەدى دەگەن اڭگىمە ەمەس قوي. سوندىقتان ءبىز وبلىس ورتالىقتارىندا كوتتەدج قالاشىقتارىن سالۋدى پيلوتتىق رەجىمدە ىسكە اسىرىپ كورگەندى ءجون كوردىك. قالعان وڭىرلەردە، قالا، اۋدان، مونوقالالاردا (كەزەكتە تۇرعان ءبىر وتباسىنىڭ بىرنەشە مۇشەسىنە - اۆت. ) بەرە بەرسىن. ال وبلىس ورتالىقتارى «اۋىلعا» اينالىپ كەتپەس ءۇشىن بىركەلكى كوتتەدجدەردىڭ بولعانى دۇرىس دەپ شەشتىك. ول جەردە ءبىرىڭعاي ستيل، ءبىرىڭعاي ديزاين بولادى. وسىنداي تالاپ قويىپ، الداعى ەكى جىلدا كورەيىك دەدىك»، - دەدى ق ر ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى جونىندەگى كوميتەت ءتوراعاسى مارحابات جايىمبەتوۆ قازاقپارات تىلشىسىنە.

كوميتەت باسشىسىنىڭ ايتۋىنشا، اتالعان پيلوتتىق جوبانى اعىمداعى جىلى اقتوبە، سولتۇستىك قازاقستان، پاۆلودار جانە تاعى ءبىرقاتار وبلىستاردا ىسكە اسىرۋ جوسپارلانعان.

«بۇگىندە تيپتىك جوسپارلار دايىن بولىپ قالدى. قۇرىلىس جۇمىستارىن باستايمىز، قارجى ماسەلەسى شەشىلۋ ۇستىندە. مەردىگەرلەرگە ءبىر شارشى مەترىنىڭ باعاسى 120 مىڭ تەڭگەدەن اسپاۋى كەرەك دەگەن تالاپ قويىپ وتىرمىز. ال كەزەكتە تۇرعان ازاماتتارعا ونداي ۇيلەر تەگىن بەرىلمەيدى.

«نۇرلى جەر» باعدارلاماسى اياسىنداعى قارجىلىق تەتىكتەر (تۇرعىن ءۇي قۇرىلىس جيناق بانكى جانە تاعى باسقا دا جولدار - اۆت. ) ارقىلى تاراتىلادى. دەگەنمەن، نەگىزگى باسىمدىق سول پاتەر مەن جەر كەزەگىندە تۇرعاندارعا بەرىلەدى»، - دەپ اتاپ كورسەتتى جايىمبەتوۆ.

اۆتور: ارمان اسقاروۆ