جۇلدىزاي دۇيسەنبيەۆا «الداراسپانعا» قايتىپ كەلەتىن بولدى

استانا. قازاقپارات -  «الداراسپان» تەاترىنىڭ ناۋرىز مەرەكەسىنە وراي ۇيىمداستىرىلعان كونسەرتىندە جۇلدىزاي دۇيسەنبيەۆا ونەر كورسەتەدى. بۇل تۋرالى «ايەل باقىتى» باعدارلاماسىندا ايتىلدى.

اتالعان باعدارلاماعا حابارلاسقان كورەرمەن جۇلدىزايدان «الداراسپان» تەاترىنا قايتىپ كەلۋىن ءوتىندى. اكتريسا ءوز كەزەگىندە بالاسىنىڭ ءالى كىشى ەكەنىن ايتىپ اقتالدى.

«جۇلدىزاي حانىم، «الداراسپانعا» قايتىپ كەلىپ، سول تەاتردىڭ كوركى بولسا ەكەن دەپ ساعىنامىن. ءسىزدىڭ ورنىڭىزدى ەشكىم باسا المايدى. كەرەمەت ويىنىڭىزعا قاراپ ءسىزدى قاتتى جاقسى كورەمىن، ەرەكشە باعالايمىن. ءسىز «الداراسپانعا» قايتىپ كەلسەڭىز، ول تەاتردا كوپ نارسە وزگەرەتىن ەدى دەپ ويلايمىن»، - دەيدى حابارلاسقان كورەرمەن. اكتريسا بۇل سوزدەردەن كەيىن كوڭىلىنىڭ بوساپ قالعانىن جاسىرمادى. مۇنىمەن قاتار، سوڭعى جاڭالىقتارىن دا ايتىپ ءوتۋدى ۇمىتپادى.

«نۇرجان ەكەۋىمىز تەاتردان كەتكەن كەزدە، ايەلى مەن كۇيەۋى اجىراسىپ جاتقانداي بولدىق. ال حالىق ەكى تاراپتى قوسا الماي جۇرگەن سياقتى. ماعان ءتىپتى «وسىنىڭ نەسى قيىن؟ سەن ءبىرىنشى بولىپ بارا سالساڭشى؟ !» دەپ ايتاتىندار دا بار. شىن مانىندە، قازىر ارامىزدا ەشقانداي كيكىلجىڭ جوق. بالام كىشكەنتاي بولعاندىقتان، گاسترولدىك ساپارعا كوپ شىعا الماي جاتىرمىن. سول سەبەپتى عانا اراسىندا قوناق بولىپ ءجۇرمىن. مەن ساحنادان كەتپەيمىن. كەلەسى جىلى باستان- اياق كونسەرتىندە ءجۇرۋىم مۇمكىن. بيىل توركىندەپ بارامىن، مەنى قالاي قابىلدايتىنىن كورەمىن.

ول بەرەتىنىن بەرسىن، مەن الايىن. بارلىعىن سودان كەيىن كورەتىن بولامىز. نيەتىڭىزگە كوپ راحمەت! مەنىڭ كوڭىلىم بوساپ كەتتى. كۇيەۋىم ساحناعا شىعۋىما قارسى ەمەس. سول سەبەپتى عانا قىزىمنىڭ 10 ايلىعىنان باستاپ ساحنادا ءجۇرمىن. كىشكەنتاي بالالارعا ارنالعان ستۋديام بار. بالالار تەاترىن دا اشىپ الدىم. 26 - اقپاندا شىمكەنتتەن تاعى دا ءبىر بالالار ستۋدياسىن اشۋىم مۇمكىن. ازىرگە كاستينگ جاريالاپ قويدىم. سول كۇنى نۇرجانمەن كەزدەسەمىن. قۇداي قالاسا، كىشكەنتايىم كەلەسى جىلى اياققا تۇرىپ السىن. وسى ەكى ورتادا ءبىر شىعىپ ۇلگەرەمىن. ودان كەيىن قايتادان دەموگرافيانى قولعا الامىن»، - دەيدى جۇلدىزاي حانىم.

Stan.kz