برازيليادا الەمدە وتە سيرەك كەزدەسەتىن جىلاندى ۇستادى - كەسكىن

استانا. قازاقپارات - عالىمدار ۇستالعان جىلانعا ارنايى قۇرىلعى ورناتىپ، ورمانعا بوساتىپ جىبەرۋدى جوسپارلاپ وتىر.

برازيلياداعى ورماندا ۇزىندىعى 1,7 مەترگە جەتەتىن جەر شارىندا سيرەك كەزدەسەتىن جىلان ۇستالدى، دەپ حابارلايدى Science.

الدىمەن، ونى ۇستاعان ادامدار وزدەرىن قورقىتقان جورعالاۋشىنى ولتىرمەك بولعان. الايدا، ونى ۇستاپ العان سوڭ، زوولوگ ماماندارعا حابارلاۋدى ءجون كورگەن. الەمدە سيرەك كەزدەسەتىن جىلان عالىمداردىڭ قولىنا وسىلايشا تۇسكەن. بۇل - كروپان ايداھار جىلانى بولىپ تابىلادى.

تاريحتا ادامزات بالاسىنىڭ جىلاننىڭ بۇل ءتۇرىن كەزدەستىرگەن 5 قانا جايت تىركەلگەن. ادەتتە، كروپان ايداھار جىلانىن زەرتتەۋشىلەر تەك ءولى كۇيىندە عانا كەزدەستىرەتىن، سەبەبى جەرگىلىكتى تۇرعىندار ولاردى ءولتىرىپ وتىرعان. عىلىمدا جىلاننىڭ بۇل ءتۇرىن تىرىدەي كەزدەستىرگەن ءبىر عانا جايت 1953 -جىلى ورىن العان بولاتىن. مىنە، ەندى عالىمداردىڭ پايداسىنا ەكىنشى رەت مۇمكىندىك بەرىلىپ وتىر.

زەرتتەۋدى سان- پاۋلۋ ۋنيۆەرسيتەتى مەن بۋتانتان ينستيتۋتى بىرلەسىپ جۇرگىزۋدە. زەرتتەۋ بارىسىندا ونىڭ ۇرعاشى جىلان ەكەنى انىقتالىپ وتىر. ونىڭ ۇزىندىعى 1,7 مەتر، سالماعى 1,5 كيلوگرامم. جوتاسى قارا ءتۇستى رومبا ءتارىزدى ايشىقتارمەن ورنەكتەلگەن، باۋىر جاعى جاسىل ءتۇستى.

جىلان ۋلى ەمەس، قۇستارمەن جانە ۇساق جانۋارلارمەن قورەكتەنۋى ىقتيمال. ول اعاشتىڭ ۇشار باسىندا تىرشىلىك ەتەتىن بولۋى مۇمكىن. عالىمدار ۇستالعان جىلانعا ارنايى قۇرىلعى ورناتىپ، ورمانعا بوساتىپ جىبەرۋدى جوسپارلاپ وتىر.