ازيادا ويىندارى تاريحىندا قازاقستان مەدال سانى بويىنشا ۇزدىك ۇشتىكتە
ەستەرىڭىزگە سالا كەتەيىك، استانا مەن الماتى قالالارىندا VII قىسقى «ازيادانى» وتكىزۋ كەزىندە ازيا وليمپيادالىق كەڭەسى باس اسسامبلەياسىنىڭ وتىرىسىندا كەلەسى بايراقتى باسەكەنى ۇيىمداستىرۋ قۇقىعىن جاپونيانىڭ ساپپورو جانە وبيحيرو قالالارىنا بەرۋ تۋرالى شەشىم قابىلداندى. بۇل دودا ساپپورو قالاسىندا ءۇشىنشى رەت وتكەلى وتىر.
جالپى ازيادا ويىندارىن جاپونيا ءتورتىنشى مارتە قابىلدايدى. 11 -اقپاندا الماتى قالاسىندا قازاقستاندىق دەلەگاتسيانى جاپونيادا وتەتىن VIII قىسقى ازيا ويىندارىنا سالتاناتتى شىعارىپ سالۋ ءراسىمى وتكەن بولاتىن. بۇل مەرەكەلى ءىس- شارادا ءبىزدىڭ تۋ ۇستاۋشىمىز - شاڭعىشى ەردوس احماديەۆ سپورتشىلار اتىنان انت وقىپ، جەڭىسپەن ورالۋعا ۋادە بەردى.
نەگىزى بۇل ويىندار 2015 -جىلى ءوتۋى ءتيىس ەدى. الايدا، 2009 -جىلعى 3 -شىلدەدە سينگاپۋردە وتكەن ازيا وليمپيادالىق كەڭەسىنىڭ (ا و ك) باس اسسامبلەياسى ونى قىسقى وليمپيادا ويىندارى قارساڭىنداعى جىلعا اۋىستىرۋعا شەشىم قابىلدادى. قىسقى ازيا ويىندارى - ازيا وليمپيادالىق كەڭەسىنىڭ مۇشەلەرى اراسىندا وتەتىن قىسقى سپورت تۇرلەرىنىڭ جارىسى.
بۇل جارىستاردىڭ تاريحى مىناداي: جاپونيانىڭ وليمپيادا كوميتەتى 1982 -جىلى ازيا ويىندارىنىڭ قىسقى نۇسقاسىن ۇيىمداستىرۋدى ۇسىنادى. ولاردىڭ بۇل باستاماسى قولداۋ تاۋىپ، ءبىرىنشى قىسقى ازيادا 1986 -جىلى ساپپورو قالاسى (1972 -جىلعى قىسقى وليمپيادا ويىندارىنان كەيىن قالادا قاجەتتى ينفراقۇرىلىم بار ەدى) ءوتتى.
العاشقى ويىندارعا بار- جوعى جەتى ەلدىڭ وكىلدەرى قاتىسسا دا، كەيىننەن ولاردىڭ سانى ارتىپ، 2007 -جىلعى ويىنداردا ازيا وليمپيادالىق كەڭەسىنە مۇشە 45 مەملەكەتتىڭ 27 سى قاتىستى. بۇعان دەيىنگى ويىنداردىڭ 2011 -جىلى قاڭتار- اقپاندا الماتى مەن استانا قالالارىندا وتكەنىن تاعى دا ەسكە سالامىز. قازاقستان اتالعان جارىسقا التىنشى رەت قاتىسقالى وتىر.
ءبىزدىڭ ەلدىڭ قىسقى سپورت وكىلدەرى تاۋەلسىز كوماندا رەتىندە 1996 -جىلعى حاربيندەگى (قىتاي) «اق ازياداعا» العاش رەت قاتىسىپ، 14 التىنمەن، 2-ورىندى يەلەنگەن بولاتىن. قازاقستاندىقتار 1999 -جىلعى قۇرلىقتىق قىسقى «وليمپيادادا» 10 التىن مەدالمەن، 3-ورىنعا تۇراقتادى.
ءتورت جىل وتكەن سوڭ، قازاقستان دەلەگاتسياسى جاپونيانىڭ اوموري قالاسىندا جۇلدەگەرلەر قاتارىنان شىعىپ قالىپ، 4-ورىندى يەلەندى. قازاقستاندىق سپورتشىلار 2003 -جىلعى ساتسىزدىكتى 2007 -جىلعى قىتايدىڭ چانتۋ قالاسىندا وتكەن VI ويىنداردا دا قايتالادى. ال 2011 -جىلعى VII ويىنداردا جالپىكوماندالىق ەسەپتە ءبىرىنشى ورىنعا شىقتى.
ازيا ويىندارى وتكەن بارلىق ۋاقىت ىشىندە كەشەندى جارىستار ءتورت ەلدە ءوتتى. ولار: جاپونيا، قىتاي، وڭتۇستىك كورەيا جانە قازاقستان. ويىندار جاپونيادا ءتورت رەت، قىتايدا ەكى مارتە جانە كورەيا مەن قازاقستاندا ءبىر- ءبىر رەت جالاۋىن جەلبىرەتتى. وسى وتكەن 7 ويىنداردا ازيانىڭ 10 ەلىنىڭ وكىلدەرى مەدالدار يەلەندى. قىسقى سپورت تۇرلەرىنەن مىقتى سانالاتىن جاپونيا، قىتاي، قازاقستان جانە وڭتۇستىك كورەيادان باسقا، موڭعوليا، يران، قىرعىزستان، ليۆان، وزبەكستان جانە كحدر سپورتشىلارى دا جۇلدەگەرلەر قاتارىنان كورىنگەن. بارلىق 7 ازيادانىڭ تاريحىن زەردەلەپ قاراساق، جاپونيا قۇراماسى ەڭ كوپ مەدال يەلەندى. ەكىنشى ورىندا - قىتاي. ءۇشىنشى ورىندا قازاقستان (69 التىن، 51 كۇمىس، 44 قولا، بارلىعى 164 مەدال).
وسىلايشا، جالپىكوماندالىق ەسەپتە ءبىز مەدال جاعىنان باستى قارسىلاسىمىز وڭتۇستىك كورەيادان وزىپ تۇرمىز. 2017 -جىلعى ساپپورو قالاسىندا وتەتىن ويىنداردا سپورتتىڭ 11 تۇرىنەن 64 مەدال جيىنتىعى ساراپقا سالىنادى.
قازاقستان دەلەگاتسياسى وسى ويىندارعا كەيبىر سپورت تۇرلەرى بويىنشا ەكىنشى قۇراممەن بارادى. ونىڭ سەبەبى، ءبىزدىڭ كوشباسشىلارىمىزدا بۇل ۋاقىتتا ءبىرقاتار سپورت تۇرلەرىنەن الەم چەمپيوناتى، الەم كۋبوگىنىڭ كەزەڭدەرى وتەدى. كەيبىر وزا شاباتىن سپورتشىلارىمىز 28-دۇنيەجۇزىلىك قىسقى ۋنيۆەرسيادادان (الماتى قالاسى، 29 -قاڭتار-8 اقپان) كەيىن از ۋاقىت ىشىندە سپورتتىق بابىنا كەلىپ، تولىققاندى دايىندىققا كىرىسە المايدى.
سوعان قاراماستان، ءبىزدىڭ كوماندانىڭ قۇرامىندا دەنيس تەن، ەليزابەت تۇرسىنبايەۆا (مانەرلەپ سىرعاناۋ)، رومان كرەچ، دەنيس كۋزين، ەكاتەرينا ايدوۆا، دميتري بابەنكو (ءبارى - كونكيمەن جۇگىرۋ سپورتى)، دميتريي رەيحارد (فريستايل- موگۋل)، الينا رايكوۆا، گالينا ۆيشنيەۆسكايا (ەكەۋى دە - بياتلون) ، نيكولاي چەبوتكو (شاڭعىمەن جۇگىرۋ)، ايدار بەكجانوۆ (شورت- ترەك) ، مارات جاپاروۆ (شاڭعىمەن تۇعىردان سەكىرۋ) سىندى اتاقتى سپورتشىلارىمىز بار. اشىلۋ سالتاناتىندا تۋ ۇستاۋشى، شاڭعى جارىسىنان قازاقستاننىڭ 5 دۇركىن چەمپيونى ەردوس احماديەۆ قازاقستان سپورتتىق دەلەگاتسياسىن باستاپ شىعادى. 2014 -جىلعى سوچيدەگى وليمپيادادا دا ەردوس قازاق ەلىنىڭ تۋىن كوتەرىپ شىققان ەدى.
جالپى قازاقستان قۇراما كومانداسىنىڭ وسى ويىنداردا بارلىق 11 سپورت ءتۇرى بويىنشا 116 سپورتشىسى قاتىسادى. ەل قۇراماسىنىڭ جاتتىقتىرۋشىلار شتابىنىڭ قازاقستاننىڭ تاياۋ اراداعى رەزەرۆىن- ءىزباسارلارىن سىناققا سالىپ، بايقاپ كورۋگە مۇمكىندىگى بار. ال سپورتشىلارىمىز وزدەرىنىڭ قۇرلىقتىق ەڭ ءىرى جارىسقا قاتىسىپ، ءوز ونەرلەرىن كورسەتىپ، ناتيجەلەرىن جاقسارتۋعا وڭتايلى ءسات تۋىپ تۇر. ەندەشە، سپورتشىلارىمىزعا جانكۇيەر بولايىق!
