وقۋشىنى ۇرعان مۇعالىمنىڭ ءىسى توقتاتىلدى
بالاسىن ۇرعاندىعى تۋرالى ارىز تۇسىرگەن اتا-انا شاعىمدارىن كەرى قايتارىپ الدى، دەپ حابارلايدى قازاقپارات ءتىلشىسى. ۇستازدان تاياق جەگەن ۇلدىڭ اتا-اناسى قۇزىرلى ورگانعا شاعىمدانعاننان كەيىن، مۇعالىم دە ولاردىڭ ۇستىنەن ارىز تۇسىرگەن. سوڭىندا قوس تاراپ ءوزارا تاتۋلاسىپ، شاعىمدارىن قايتارىپ الدى.
«سوت مەديتسينالىق- ساراپتاماعا قاتىسپايمىز جانە ءبىر- بىرىمىزگە وكپەمىز جوق، تاتۋلاستىق دەگەن تۇرعىدا ەكى جاقتان دا ءوتىنىش تۇسكەن. قازىرگى ۋاقىتتا ق ر قىلمىستىق پروتسەسسۋالدىق كودەكسىنىڭ 35-بابىنا سايكەس ءىس توقتاتىلدى»، - دەپ ءمالىم ەتتى وبلىستىق ءى ءى د باسپا ءسوز قىزمەتىنىڭ جەتەكشىسى ايمان مىرزەكوۆا.
ەستەرىڭىزگە سالا كەتەيىك، الەۋمەتتىك جەلىدە بەلگىسىز ايەل ادامنىڭ وقۋشىنى توپەلەپ ۇرىپ جاتقانى تۋرالى بەينەجازبا تاراپ، كوپشىلىكتىڭ نارازىلىعىن تۋعىزعان ەدى. سوڭىنان انىقتالعانداي، وقۋشى مەن مۇعالىم اراسىنداعى كيكىلجىڭ ىلە اۋدانىنا قاراستى بايسەركە اۋىلىنداعى №9- مەكتەپتە ورىن العان. وبلىستىق ءبىلىم باسقارماسىنىڭ بەرگەن اقپاراتىنا سايكەس، مۇعالىمنەن تاياق جەگەن شاكىرت ۇستازدىڭ قىزىن ۇرعان كورىنەدى. وسى ارەكەتى ءۇشىن اشۋعا بۋلىققان انا ءۇزىلىس كەزىندە سىنىپقا كەلىپ، بالاعا ەسەسىن قايتارعان.
بالاسىن جاقتاعان مۇعالىم ميرا مامەداليەۆا جۇمىستان شىعارىلدى. ال مۇعالىمنەن تاياق جەگەن بالانىڭ اتا-اناسى پوليتسيا بولىمە بارىپ، ارىز جازعان. ارتىنشا ۇستازدىڭ ۇستىنەن ق ر قىلمىستىق كودەكسىنىڭ 107-بابىمەن (دەنساۋلىققا قاساقانا اۋىرلىعى ورتاشا زيان كەلتىرۋ) ءىس قوزعالعان بولاتىن.
اۆتور: سامال قابىشەۆا
