بيلىك وكىلەتتىكتەرىن ءبولۋ قازاقستاننىڭ دەموكراتيالانۋى تۇرعىسىندا بارىنشا وزەكتى - ساراپشى

استانا. قازاقپارات - قازاقستان پرەزيدەنتى نۇرسۇلتان نازاربايەۆتىڭ جولداۋى ءار ۋاقىتتا دا ستراتەگيالىق قۇجات، ەلدىڭ ودان ارى دامۋىنىڭ بەلگىلى ءبىر ءىس-قيمىل جوسپارى سانالادى.

مۇنداي پىكىردى قازاقپاراتتىڭ ازەربايجانداعى ارناۋلى ءتىلشىسى بەكباۋ تايمانوۆقا «قازاقستان-ازەربايجان» دوستىق قوعامىنىڭ پرەزيدەنتى ەلدار گيۋايدين ءبىلدىردى.

«مۇنى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» تاقىرىبىنداعى كەزەكتى جولداۋى تاعى دا دالەلدەي تۇسەدى. قازاقستان باسشىسى ءوزىنىڭ جولداۋىندا سوڭعى جىلدارداعى جەتىستىكتەردى ەسكە تۇسىرە كەلە، ەلدىڭ الەۋمەتىن تولىق كولەمدە جۇزەگە اسىرۋ قاجەتتىگىن اتاپ كورسەتەدى»، - دەدى ول.

ونىڭ پايىمداۋىنشا، تاياۋ بولاشاقتا قازاقستاننىڭ الەمنىڭ دامىعان 30 ەلىنىڭ قاتارىنا كىرەتىندىگىنە ەشقانداي كۇدىك جوق. شىن مانىندە رەسپۋبليكا ءدال وسى ماقساتقا قاراي سەنىمدى قادام باسىپ كەلەدى.

«كورەگەن كوشباسشىسىنىڭ باسشىلىعىمەن باۋىرلاس قازاقستان قازىردىڭ وزىندە ۇلكەن جەتىستىكتەرگە جەتتى، بيىك بەلەستەردى باعىندىردى. مۇنى حالىقتىڭ جوعارى ءومىر ءسۇرۋ دەڭگەيى، ولاردىڭ جوعارى ءال-اۋقاتى، ەكونوميكاداعى تۇراقتىلىق، سونىمەن بىرگە ەلدىڭ حالىقارالىق ارەناداعى بەدەلى كورسەتىپ وتىر»، - دەدى ساراپشى.

ونىڭ اتاپ وتۋىنشە، 2017-جىل ق ر پرەزيدەنتىنىڭ ءوز وكىلەتتىكتەرىن ۇكىمەت پەن پارلامەنت اراسىندا قايتا ءبولۋ تۋرالى ستراتەگيالىق ماڭىزى بار شەشىم قابىلدانۋىمەن ايرىقشا بولماق. بۇل قادام قازاقستاننىڭ دەموكراتيالانۋ پروتسەسىن جالعاستىرۋ تۇرعىسىندا بارىنشا وزەكتى بولا تۇسپەك ءارى ول ءوزىنىڭ وڭ ناتيجەسىن بەرەتىن بولادى

«ءبىز قازاقستاننىڭ تابىسقا جەتەتىندىگىنە شىنايى سەنەمىز. جاس مەملەكەتتىڭ الدىندا كوپتەگەن جوسپار مەن مىندەت بار جانە جولداۋ حالىقتىڭ ءوز كوشباسشىسىمەن العا ۇمتىلۋىنا مۇمكىندىك بەرەدى»، - دەدى ەلدار گيۋنايدىن.

اۆتور: مارلان جيەمباي