سيريالىق قارۋلى وپپوزيتسيا باسشىسى استاناعا كەلدى

استانا. قازاقپارات - سيريالىق قارۋلى وپپوزيتسيا باسشىسى، «دجەيش ال-يسلام» توبىنىڭ وكىلى موحاممەد اللۋش بۇگىن سيرياداعى احۋالدى رەتتەۋ جونىندەگى كەلىسسوزدەرگە قاتىسۋ ءۇشىن استاناعا كەلدى.

بۇل اقپاراتتى قازاقپارات تىلشىسىنە ق ر سىرتقى ىستەر مينيسترلىگىنىڭ رەسمي وكىلى انۋار جايناقوۆ راستادى.

سيريا ماسەلەسى بويىنشا استاناداعى كەلىسسوزدەردىڭ (استانا پروتسەسى) ءبىرىنشى راۋندى 23-24- قاڭتار كۇندەرى وتكەن بولاتىن. وندا سيرياداعى سوعىس قيمىلدارىن توقتاتۋعا قاداعالاۋ جاساۋ رەجىمى بويىنشا تەتىكتەر قۇرۋ شەشىمى قابىلداندى.

جەنيەۆاداعى ب ۇ ۇ قامقورلىعىمەن وتەتىن سيرياارالىق كەلىسسوزدەردىڭ باستالۋى 23- اقپانعا جوسپارلانعان.

ەسكە سالا كەتەيىك، بۇگىن، 16- اقپان كۇنى سيريا احۋالىن رەتتەۋگە بايلانىستى استانا پروتسەسىنىڭ اياسىندا جوعارى دەڭگەيدە كەزەكتى وتىرىس وتەدى.

سيرياداعى اتىستى توقتاتۋعا كەپىلدىك بەرىپ وتىرعان رەسەي، تۇركيا مەن يران مەملەكەتتەرىنىڭ حابارلاۋىنشا، وتىرىستا سيريا جەرىندە اسكەري ءىس-قيمىلدى توقتاتۋ رەجىمىن ساقتاۋ ماسەلەلەرى، سونىڭ ىشىندە ناقتى تەرريتوريالاردا احۋالدى تۇراقتاندىرۋ جايى ءسوز بولادى دەگەن جوسپار بار. سونداي-اق بىرلەسكەن شۇعىل توپ تۋرالى ەرەجە قابىلدانىپ، بىتىمگەرلىك رەجىمدى كۇشەيتۋ جانە جەنيەۆا كەلىسسوزدەرى الدىنداعى باسقا دا شارالار تالقىعا سالىنباق.

استاناداعى كەزەكتى كەزدەسۋگە يوردانيا كورولدىگى، سيريا اراب رەسپۋبليكاسى، سول جەردەگى قارۋلى وپپوزيتسيانىڭ وكىلدەرى، ب ۇ ۇ باس حاتشىسىنىڭ ارنايى وكىلى س. دە ميستۋرا، سونداي-اق ا ق ش باقىلاۋشى رەتىندە شاقىرىلىپ وتىر. بۇعان دەيىن سيريا ماسەلەسىن رەتتەۋگە ارنالعان استانا پروتسەسىنەن كەيىن ەلوردادا حالىقارالىق تەحنيكالىق كەزدەسۋ وتكەن بولاتىن. سونىڭ ناتيجەسى بويىنشا ر ف قارۋلى كۇشتەرى شۇعىل باسقارما باسشىسىنىڭ ورىنباسارى، گەنەرال-مايور ستانيسلاۆ گادجيماگومەدوۆ مالىمدەمە جاساعان بولاتىن.

اۆتور: مارلان جيەمباي