ترامپتىڭ قاي سوزىنە سەنەمىز؟

استانا. قازاقپارات - ا ق ش- تىڭ جاڭا پرەزيدەنتى الداعى ۋاقىتتا قىرىم كيەۆتىڭ قاراۋىنا وتەتىنىنە جانە ۋكراينانىڭ شىعىسىندا ءجۇرىپ جاتقان قارۋلى قاقتىعىس توقتايتىنىنا ءۇمىتتى.

بۇل جونىندە كەشە كەزەكتى بريفينگتە اق ءۇي باسپا ءسوز حاتشىسى شون سپايسەر مالىمدەدى.

ونىڭ ايتۋىنشا، ا ق ش پرەزيدەنتى «رەسەي ۇكىمەتىنە دونباسقا قىسىم جاساۋدى ازايتىپ، قىرىمدى كەرى قايتارۋ» جونىندە ناقتى ويىن بىلدىرگەن. «دەگەنمەن دونالد ترامپ رەسەيمەن جاقسى قارىم-قاتىناستا بولارىنا سەنىمدى. ويتكەنى تاياۋ شىعىستا ارەكەت ەتىپ جاتقان «يسلام مەملەكەتى» راديكالدى توبىمەن جانە حالىقارالىق تەروريزممەن بىرلەسە كۇرەۋگە مۇددەلى»، - دەيدى شون سپايسەر.

ءبىر قىزىق نارسە، پرەزيدەنتتىك سايلاۋالدى ناۋقانى تۇسىندا دونالد ترامپ «قىرىمدى رەسەيدىڭ ءبىر بولشەگى رەتىندە تانيمىن» دەپ مالىمدەمە جاساعان ەدى.

ەندى كەلىپ، «قىرىمدى رەسەي ۋكرايناعا كەرى قايتارۋى ءتيىس» دەگەندى ايتادى. بۇل قاراما-قايشى پىكىردىڭ قايسىسىنا سەنۋگە بولادى؟

رەسەي مەن ا ق ش اراسىنداعى قارىم-قاتىناسقا كەلەتىن بولساق، كىم-كىمگە قىسىم جاساي باستاعانىن مىنادان انىق بايقاۋعا بولادى.

ماسەلەن، «رەسەي قاتەرىنىڭ الدىن الۋ» دەگەن ماقساتتا سوڭعى بىرەر ايدا ا ق ش ەۋروپاعا كوپتەگەن اسكەري تەحنيكا جانە ساربازدارىن اتتاندىردى. سونىڭ ءبىرى كەشە 49 UH-60 Black Hawk جانە CH-47F Chinook اسكەري تىك ۇشاق جانە كوپتەگەن بروندى جۇك كولىكتەرى گەرمانياعا جەتكىزىلدى.

كەلەسى اپتادا تاعى دا 20 عا تارتا تىكۇشاقتار اكەلىنبەك. ءبىر ايتا كەتەتىن جايت، ا ق ش بۇدان بۇرىن ەۋروپاعا 87 م1 Abrams تانكسىن، 144 M2 Bradley ب م پ- سىن، ءوزى جۇرەتىن 18 M109 Paladin گاۋبيتساسىن جانە 4 مىڭ جاۋىنگەر جەتكىزگەن. مۇنىڭ ءبارى نە ءۇشىن رەسەي شەكاراسىنىڭ ماڭايىنا ورنالاستىرا باستادى؟ ارينە مۇنى الداعى ۋاقىتتا شىعىس ەۋروپا جانە بالتىق جاعالاۋى ەلدەرىندە وتەتىن ن ا ت و- نىڭ Atlantic Resolve اسكەري وقۋ-جاتتىعۋ جيىنى اياسىندا بولىپ جاتقان ءىس-شارا دەۋگە دە بولار ەدى.

ءبىراق بۇل اسكەري تەحنيكا مەن اسكەر جيىن بىتكەن سوڭدا وسى ايماقتا قالا بەرمەكشى. نەگە؟ بۇل جاعى بەلگىسىز.

اينۇر قازىكەنوۆا

«ايقىن»