قىتاي ساراپشىلارى: قازاق-وزبەك قاتىناسى ءتۇپتىڭ تۇبىندە ورتا ازيالىق وداققا الىپ كەلۋى مۇمكىن

استانا. قازاقپارات - وزبەكستاننىڭ جاڭا پرەزيدەنتى العاشقى رەسمي ساپارىن قاي ەلدەن باستاماق؟ كىممەن مۇددەلەس بولماق؟ بۇل كىمدى دە بولسا، قىزىقتىرارى انىق.

ال رەسمي تاشكەنت وسىلاردىڭ ىشىنەن كىمدى تاڭدايدى، كىمگە العاشقى ساپارىن ارنايدى؟

سونىمەن وزبەكستان پرەزيدەنتى شاۆكات ميرزيەيەۆ ناۋرىز-ءساۋىر ايلارىنىڭ بىرىندە قازاقستانعا ارنايى ساپارمەن كەلمەك. بۇل ماسەلە شەشىلىپ قويعانعا ۇقسايدى. بۇعان دەيىن مەملەكەت باسشىسى نۇرسۇلتان نازاربايەۆ وزبەك ارىپتەسىن قازاقستانعا كەلىپ-كەتۋىن سۇراعان.

ۇسىنىس قابىل الىندى. قازىر ەكى جاقتى دايىندىق ءجۇرىپ جاتىر. دەگەنمەن، الداعى بىرەر كۇندە شاۆكات ميرزيەيەۆ تۇركىمەنستانعا جەدەل ساپار شەكپەك. بۇعان سەبەپ بار.

بىرىنشىدەن وتكەن جەكسەنبى كۇنى بولعان پرەزيدەنتتىك سايلاۋدا جەڭىسكە جەتكەن بەردىمۋحامەدوۆتى قۇتتىقتاۋ كەرەك، ەكىنشىدەن وسى قالادا مارقۇم وزبەكتىڭ العاشقى پرەزيدەنتى يسلام كاريموۆكە ەسكەرتكىش اشىلادى. سوعان قاتىسۋى ءتيىس. ۇشىنشىدەن، وزبەكستان-تۇركىمەنستان -  يران جانە وموندى جالعايتىن كولىك جانە تەمىرجول ىسكە قوسىلماق.

بۇل وسى كۇرە جولدا وتىرعان مەملەكەتتەر ءۇشىن اسا ماڭىزدى جوبا. ويتكەنى ولاردىڭ پارسى شىعاناعىنا شىعۋىنا جول اشىلادى. دەمەك، بۇل جول ورتا ازيادا جاتقان ەلدەر مەن باتىستى جالعايتىن بىردەن-ءبىر ساۋدا-ساتتىق جولى بولماق.

ال وزبەك باسشىسىنىڭ استاناعا ساپارى بولەك. ەكى ەلدە ورتا ازيادا جاتقان رەسپۋبليكالار ىشىندە اسا ماڭىزدى ءرول اتقاراتىن الەۋەتكە يە. «الداعى ۋاقىتتا بۇل ەكى مەملەكەتتە ورتا ازيا مۇددەسى ءۇشىن بىرلەسە قيمىلداۋى ءتيىس. ويتكەنى بىرلىك بار جەردە عانا سىرتقى كۇشتەرگە تويتارىس بەرە الاتىنىن ەكى ەل باسشىلارى بىلەدى. دەمەك وسى كەزدەسۋدە استانا مەن تاشكەنت كوپ ماسەلە جونىندە ورتاق پىكرىگە كەلەرى انىق»، - دەيدى ورتا ازيا جونىندەگى ساراپشى الەكساندر كنيازيەۆ.

ال قىتاي ساراپشىلارى «قازاق-وزبەك قاتىناسىنىڭ سوڭعى كەزدەگى تىم بەلسەندىلىگى ءتۇپتىڭ تۇبىندە ورتا ازيالىق وداققا الىپ كەلۋى مۇمكىن» دەسەدى. راس بۇدان ءبىراز جىل بۇرىن ەلباسى نۇرسۇلتان نازاربايەۆ ورتا ازيا ەلدەرىنىڭ وداعى قۇرۋ جونىندە باستاما كوتەرگەن.

ءبىراق سول كەزدەگى مەملەكەت باسشىلارىنىڭ جەكە امبيتسياسى ونى قۇرۋعا جول بەرمەگەن. ال قازىرگى كۇنى سونىڭ ورايى كەلگەن سەكىلدى. شاۆكات ميرزيەيەۆتىڭ قىتاي، ا ق ش، رەسەيدى ەمەس، العاشقى ساپارى رەتىندە تۇركىمەنستان مەن قازاقستاندى تاڭداۋى سونى مەڭزەيتىن سياقتى.

اينۇر قازىكەنوۆا

«ايقىن»