مينيستر مۇحامەدي ۇلى قازاقستاندىق بياتلونشىلاردىڭ دوپينگ- سىناماسى ناتيجەسىن جاريالادى - فوتو

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى اۆستريادا الەم چەمپيوناتىنا قاتىسقان قازاقستاندىق بياتلونشىلاردىڭ دوپينگ- سىناماسىنىڭ ناتيجەسىن جاريالادى، دەپ حابارلايدى قازاقپارات.

«دوستار، قازىر عانا بۇكىلالەمدىك دوپينگ اگەنتتىگى (WADA) بياتلونشىلارىمىزدان العان دوپينگ- سىنامانىڭ رەسمي ناتيجەسىن الدىق - ءبىزدىڭ سپورتشىلار تازا! بۇعان دەيىن ايتقانىمداي، ءبىزدىڭ سپورتشىلار دوپينگ قولدانباعان. مەن ءاۋ باستان ءبىزدىڭ كومانداعا سەنگەنمىن، ولاردىڭ سەنىمدى اقتاعانىنا قۋانىشتىمىن. قايتالاپ ايتايىن، بۇل بولاشاقتا ءبارىمىز ءۇشىن ۇلكەن ساباق. ال مىناۋ WADA- نىڭ قۇجاتتارى، سپورتشىلارىمىزدىڭ ەسىمدەرى نومەرلەرمەن قۇپيالاندىرىلعان»، - دەپ جازدى مينيستر Facebook-تەگى پاراقشاسىندا.

 

ەسكە سالا كەتەيىك، بياتلوننان قازاقستان قۇراماسى اۆستريادا وتكەن الەم چەمپيوناتى كەزىندە دوپينگ قولداندى دەگەن كۇدىككە ىلىنگەن بولاتىن. 23 -قاڭتار كۇن انتحولتس ماڭىندا مەديتسينالىق ءدارى- دارمەكتەردىڭ قالدىقتارى بار قوراپتار تابىلعان. ءدال سول جەردەن قازاقستان قۇراماسى دارىگەرىنىڭ اككرەديتاتسياسى تابىلدى. وسى سەبەپتى كەيىن ءبىزدىڭ كومانداعا ءتىنتۋ جۇرگىزىلگەن ەدى. تەكسەرىستەن كەيىن قازاقستاندىق سپورتشىلار جارىسقا قاتىسۋعا رۇقسات الدى.

اۆتور: ەربول جانات