قىتايدا دونور بولۋعا ءوز ەركىمەن كەلىسىمىن بەرەتىندەر قاتارى ارتقان

استانا. قازاقپارات - قىتايلىقتار كوز جۇمعان سوڭ دونور بولۋدان قاشپايدى. ەرىكتى تۇردە وزگەنىڭ ءومىرىن ساقتاپ قالۋ ءۇشىن كەلىسىم بەرەتىندەردىڭ قاتارى كوبەيگەن.

  بۇل تۋرالى قىتايدىڭ دونورلىق جانە ادام مۇشەلەرىن ترانسپلانتاتسيالاۋ كوميتەتىنىڭ ءتوراعاسى حۋان جەفۋ ءمالىم ەتتى.

 ايتپاقشى، اسپاناستى ەلى العاش رەت ريمدە وتكەن دەنە مۇشەلەرىن ساتۋمەن كۇرەس جونىندەگى حالىقارالىق كونفەرەنسياسىنا قاتىستى. كورشىمىز 2015 -جىلدان بەرى ءولىم جازاسىنا كەسىلگەن قىلمىسكەردىڭ مۇشەسىن الۋعا تىيىم سالعاننان كەيىن ءبىرىنشى رەت شاقىرتۋ العان. قىتايلىق ترانسپلانتاتسيانى دامىتۋ قورىنىڭ ءتوراعاسى حۋان جەفۋ باستاعان دەلەگاتسيا ۆاتيكاندا وتكەن حالىقارالىق كونفەرەنسيادا ادام مۇشەلەرىن اۋىستىرۋ سالاسىنداعى رەفورما جونىندە بايانداما جاسادى.

 ونىڭ سوزىنشە، ۇكىمەت بۇل ماسەلەگە ۇلكەن ءمان بەرىپ وتىر. 2011 -جىلدان باستاپ اعزا مۇشەلەرىن ساتۋ جانە رۇقساتسىز الۋ قىلمىستىق جاۋاپكەرشىلىككە جاتقىزىلدى. ال ەكى جىلدان بەرى قىتايدا ءولىم جازاسىنا كەسىلگەن قىلمىسكەرلەردىڭ دەنە مۇشەسىن پايدالانۋعا تىيىم سالىندى. رەسمي مالىمەت بويىنشا، قازىر ترانسپلانتاتسيا ورتالىقتارى تەك ەرىكتى دونورلارمەن جۇمىس ىستەپ جاتىر.

بىلتىر قىتايدا 10 مىڭنان استام ادامعا دەنە مۇشەسىن اۋىستىرۋ وپەراتسياسى جاسالعان. 4 مىڭ قىتايلىق دۇنيەدەن وزعان سوڭ، وزگەنىڭ ءومىرىن ۇزارتۋعا كەلىسىم بەرمەگەن جاعدايدا بۇل كورسەتكىش اناعۇرلىم تومەن بولار ەدى. قازىر كەز كەلگەن تۇرعىن وسىندا كوپ قولداناتىن WeChat قىزمەتى ارقىلى كەلىسىمىن بەرە الادى. وسىلايشا ەرىكتى دونورلاردىڭ سانى ءبىر جىلدا 10 مىڭعا ارتقان.

Alipay  ينتەرنەت دۇكەنىندەگى مەديتسينالىق قىزمەتتەر ءبولىمى ارقىلى دا دونورلىققا تىركەلۋگە بولادى. مۇنداي قىزمەت پايدا بولعان 12 ساعاتتىڭ ىشىندە 3 مىڭ ادام ءوز ەركىمەن دەنە مۇشەلەرىن بەرۋگە كەلىسكەن. جۋ جەپين ومىردەن وتكەن سوڭ، دونور بولۋعا قارسى ەمەس. ونىڭ سوزىنشە، قايتىس بولعاننان كەيىن جارامدى دەنە مۇشەلەرىن مۇقتاج جانعا قالدىرۋ دۇرىس.

 جۋ جەپين، بەيجىڭ قالاسىنىڭ تۇرعىنى:

- ادام ومىردەن وزعان سوڭ دا قوعامعا پايداسىن تيگىزۋ كەرەك. اياق استىنان ءولىپ كەتسەك، ساۋ مۇشەنىڭ ەشقانداي ماڭىزى قالمايدى. ەگەر سول ادامنىڭ ساۋ دەنە مۇشەلەرىن مەديتسينالىق جولمەن ناۋقاس جانعا بەرسە، ادامزات ءۇشىن، قوعام ءۇشىن جاسالعان ىزگى ءىس بولار ەدى. مەن ولگەننەن كەيىن جارامدى دەنە مۇشەلەرىمدى مۇقتاج جاندارعا قالدىرۋعا كەلىسەمىن. سەبەبى ولسەم دە، باسقاعا باقىت سىيلاپ كەتكەنىمدى بىلەمىن.

رەسمي مالىمەت بويىنشا، قازىر قىتايدا مۇنداي ەرىكتىلەر سانى 160 مىڭعا جەتكەن. اعزا مۇشەلەرىن بەرۋگە كەلىسەتىن جاننىڭ ءوتىنىشىن قىتايداعى « قىزىل كرەست» قوعامىنا قاراستى دونورلىق ورتالىق قابىلدايدى. بۇل مەكەمە 2010 -جىلدان بەرى ەلدەگى ترانسپلانتاتسيالاۋ جۇيەسىن جەتىلدىرۋگە اتسالىسىپ كەلەدى. دونورلاردىڭ قۇقىعىن قورعاۋ، زاڭعا وزگەرىستەر ەنگىزۋ بويىنشا دا جۇمىس ىستەيدى.

حوۋ فەنچجۋن، دونورلىق ورتالىق ديرەكتورىنىڭ ورىنباسارى:

 - قىتايدا دۇنيەدەن وتكەن ازاماتتاردىڭ عانا دەنە مۇشەسىن الۋعا رۇقسات بەرەتىن زاڭ بار. ءتىپتى، ول ەرىكتى تۇردە دونور بولۋعا كەلىسىم بەرسە دە، شەشۋشى ساتتە تۋعان- تۋىسىنىڭ ءسوزى ەسكەرىلەدى. سونىمەن قاتار ەرىكتى دونورلارمەن جۇمىس ىستەيتىن ۇيلەستىرۋشىلەر توبى بار. وندا نەگىزىنەن مەديتسينا قىزمەتكەرى دونوردىڭ تۋعان- تۋىسىنا پسيحولوگيالىق كومەك كورسەتەدى.

 اۆتورلارى: ن. بەكەن، ج. ءسۇي

www.24.kz