مەملەكەت جۇمىسقا تۇرعانى ءۇشىن اقشا تولەيدى - ۆيتسە- مينيستر جاقىپوۆا
ال كەلەسى جىلدان باستاپ اتاۋلى الەۋمەتتىك كومەكتىڭ جاڭا جۇيەسى ەنگىزىلەدى. ونىڭ ارقاسىندا مينيسترلىك ۇيدەگى ادامداردىڭ جاردەماقىسىنا قاراپ وتىرعان ازاماتتاردى جۇمىسقا شىعارۋدى جوسپارلاپ وتىر، دەپ حابارلايدى قازاقپارات ءتىلشىسى.
«قازىرگى كەزدە كوپبالالى وتباسىلارعا ارنالعان مەملەكەتتىك جاردەماقى، تۇرمىسى تومەن وتباسىلار ءۇشىن 18 جاسقا دەيىنگى مەملەكەتتىك بالالار جاردەماقىسى جانە از قامتىلعان ءۇي شارۋاشىلىعىنا بەرىلەتىن اتاۋلى الەۋمەتتىك كومەك بار. ال كەلەسى جىلدان باستاپ اتاۋلى الەۋمەتتىك كومەكتىڭ تەك ەكى ءتۇرى عانا بولادى. ولار - شارتتى جانە شارتسىز اقشالاي كومەك»، - دەدى جاقىپوۆا بۇگىن استانادا وتكەن باسپا ءسوز ءماسليحاتىندا.
شارتسىز الەۋمەتتىك كومەك مۇگەدەكتەر، زەينەتكەرلەر، مەكتەپ جاسىنداعى بالالارى بار جالعىزباستى انالارعا كورسەتىلەدى. وسى ساناتتاعى ازاماتتارعا مەملەكەتتەن جاردەماقى العانى ءۇشىن جۇمىسقا تۇرۋ مىندەتى قويىلمايدى. ال شارتتى الەۋمەتتىك كومەكتى الاتىندار مىندەتتى تۇردە جۇمىسقا تۇرۋى ءتيىس. ءبىر وتباسىدا، كەم دەگەندە، ءبىر ادام ەڭبەككە جارامدى بولسا، شارتتى اقشالاي كومەك الا الادى. ول ءۇشىن ارنايى الەۋمەتتىك كەلىسىمشارتقا قول قويۋ قاجەت. مەملەكەت ءوز تاراپىنان ءتيىستى جاردەماقى تولەپ، شارتتى كومەك الىپ وتىرعان ادامدى وقىتىپ، جۇمىسقا تۇرعىزادى. ءوز كەزەگىندە اقشالاي كومەككە جۇگىنگەن ادام جۇمىسقا تۇرۋ مىندەتىن موينىنا الادى.
«ماسەلەن، ءبىر وتباسىدا بەس ادام بار دەيىك. ءۇش ادام ەڭبەككە جارامدى، قالعان ەكەۋى مەكتەپ جاسىنداعى بالالار بولسىن. جاڭاعى ءۇش اداممەن الەۋمەتتىك كەلىسىمشارت جاسالادى. سەبەبى ەكى بالا دا مەكتەپكە بارىپ ءجۇر. الدىمەن ول ادامداردىڭ تابىسى ەسەپتەلەدى، مال ۇستاماسا، باسقا ءبىر تابىس كوزدەرى بولماسا، ەڭ تومەنگى كۇنكورىس دەڭگەيىنىڭ 60 پايىزى، ول 13 مىڭ تەڭگەدەي بولدى، ءسويتىپ، بەس ادامعا 65 مىڭ تەڭگە بەرىلەدى. ەڭبەككە جارامدى ادامنىڭ بىرەۋى قولداۋ شارالارىنان، ياعني دايىندىق كۋرستارىنا قاتىسۋدان، جۇمىسقا تۇرۋدان باس تارتسا، ءۇش بىردەي ادامنىڭ تولەماقىسى 50 پايىزعا ازايادى. ال ەكىنشى رەت باس تارتسا، مۇلدەم تولەنبەيدى. ءبىراق ەكى بالانىڭ 26 مىڭ تەڭگەسى قالا بەرەدى»، - دەپ اتاپ كورسەتتى ۆيتسە- مينيستر. وسىلايشا، ۇيدەگى ءبىر ادام قالعان ەكى ادامعا جاۋاپتى بولىپ، ۇشەۋى دە ءبىر- ءبىرىن جۇمىسقا ورنالاسۋعا قامشىلاپ وتىرادى دەگەن جوسپار بار.
ۆيتسە- ءمينيستردىڭ سوزىنە قاراعاندا، وسىدان ءۇش جىل بۇرىن اتالعان جۇيەنىڭ نەگىزىندە اقمولا، شىعىس قازاقستان مەن جامبىل وبلىستارىندا «ورلەۋ» اتتى پيلوتتىق جوبا اتقارىلدى. ءسويتىپ، 2015 -جىلدىڭ ەسەبى بويىنشا وعان 20,2 مىڭ ادام قاتىستى. كەلەسى جىلدا شارتتى كومەككە جۇگىنگەندەردىڭ سانى 38,8 مىڭعا جەتتى. سونىڭ ارقاسىندا ەڭبەككە جارامدى ازاماتتاردىڭ 90,5 پايىزى جۇمىسقا تارتىلدى. ال الەۋمەتتىك كومەككە قاراپ وتىرعانداردىڭ سانى 24,7 پايىزعا ازايدى. «اعىمداعى جىلى «ورلەۋ» جوباسى بارلىق اۋداندار مەن قالالاردا جالعاسادى. وعان ەل بيۋدجەتىندە 7,1 ميلليارد تەڭگە قاراستىرىلعان. بيىل اتالعان جوباعا 150 مىڭ ادام تارتىلادى دەگەن جوسپار بار»، - دەيدى سۆەتلانا قابىكەن قىزى.
ونىڭ ايتۋىنشا، شارتتى اقشالاي كومەك العان ادامعا جۇمىس تابىلماي قالسا، ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جەكە كاسىبىن اشۋعا مۇمكىندىك بەرىلەدى.
اۆتور: ارمان اسقاروۆ
