بايقوڭىر كەشەنىن دامىتۋدىڭ «ەكىنشى تىنىسى» اشىلادى - قىزىلوردا وبلىسىنىڭ اكىمى
سوڭعى جىلدارى بايقوڭىر قالاسىنىڭ بيۋدجەتى تەك اعىمداعى ماسەلەلەردى شەشۋگە باعىتتالۋدا. بايقوڭىردا تۇراتىن قازاقستان ازاماتتارىنىڭ ءومىر ءسۇرۋ دەڭگەيىنىڭ تومەندەۋىنە جول بەرمەس ءۇشىن وبلىس باسشىلىعى بايقوڭىر قالاسىن جانە وعان ىرگەلەس جاتقان اقاي جانە تورەتام ەلدى مەكەندەرىن دامىتۋدىڭ «جول كارتاسىن» جانە اۋماعىندا عارىش ايلاعى ورنالاسقان قارماقشى اۋدانىن دامىتۋدىڭ «جول كارتاسىن» ىسكە اسىرۋدا. بايقوڭىر قالاسىنداعى جۇمىستان قىسقارعان ادامداردى ەڭبەكپەن قامتۋ ماسەلەسى شەشىلۋدە.
سونىمەن بىرگە قازاق تىلىندە وقىتاتىن 6 مەكتەپ قازاقستاندىق ءبىلىم بەرۋ ستاندارتتارىنا كوشىرىلدى. مەديتسينالىق قىزمەت كورسەتۋدى جاقسارتۋ ءۇشىن قالاداعى توقتاپ تۇرعان جاڭادان سالىنعان پەرزەنتحانا نەگىزىندە وبلىستىق مەديتسينا ورتالىعىنىڭ فيليالى اشىلدى. قالادا نەگىزگى تاماق ونىمدەرىنىڭ باعالارى جانە كوممۋنالدىق قىزمەت تاريفتەرى جوعارى بولعاندىقتان، ءبىرىنشى قاجەتتىلىكتەگى ونىمدەر تومەندەتىلگەن باعامەن ساتۋعا شىعارىلىپ، تۇراقتى تۇردە جارمەڭكە وتكىزىلىپ كەلەدى. 2016 -جىلى عارىش قالاسىنا گاز جەتكىزىلدى.
- وكىنىشكە قاراي، رەسەي فەدەراتسياسىنىڭ يۋريسديكسياسى جاعدايىندا قازاقستاننىڭ بارلىق ەلدى مەكەندەرىنىڭ دامۋىنا سەپتىگىن تيگىزىپ وتىرعان مەملەكەتتىك باعدارلامالاردىڭ مۇمكىندىكتەرىن قالانى دامىتۋعا پايدالانا المايمىز. ءبىزدىڭ بارلىق ءىس- قيمىلىمىز ۇكىمەت ارالىق كەلىسىمدەردە رەگلامەنتتەلگەن، - دەپ اتاپ ءوتتى وبلىس اكىمى.
ۇكىمەتارالىق كوميسسيا ماجىلىسىندە بايقوڭىر كەشەنىندەگى 14 نىساندى قىزىلوردا وبلىسىنىڭ كوممۋنالدىق مەنشىگىنە بەرۋ ماسەلەسى وڭ شەشىمىن تاپقان بولاتىن. مۇنان بولەك، كاسىپكەرلىكتى دامىتۋعا بايلانىستى جالعا الىنعان اۋماقتان 11,6 مىڭ گەكتار جەردى قازاقستاندىق تاراپقا بەرۋ تۋرالى شەشىم قابىلدانعان.
- عارىش ايلاعىنىڭ كەلەشەگى كەمەل. ونىڭ بازاسىندا تەك ايەروعارىشتىق ەمەس، قورعانىس ءوندىرىسىن، شاعىن جانە ورتا بيزنەستى، عارىشتىق تۋريزمدى دامىتۋ مۇمكىندىگى بار. بۇگىندە ءبىز وسى ساۋالدى ۇكىمەت الدىنا قويىپ وتىرمىز. وزىمىزدە بار ارتىقشىلىقتارىمىزدى پايدالانۋىمىز قاجەت، «بايقوڭىر» كەشەنىن دامىتۋدىڭ «ەكىنشى تىنىسىن» اشۋعا ءمان بەرۋ كەرەك. ۇكىمەتارالىق كوميسسيا ءماجىلىسىن الداعى ءساۋىر ايىندا قىزىلوردا قالاسىندا وتكىزۋ تۋرالى كەلىسىمگە كەلدىك، - دەدى ق. كوشەربايەۆ.
اۆتور: ەلۋباي اۋەزوۆ
