قازاقتىڭ تاعى ءبىر بىلعارى قولعاپ شەبەرى كاسىپقوي بوكسقا اۋىستى

استانا. قازاقپارات - تاعى ءبىر قازاق سپورتشىسى الي بالويەۆ كاسىپقوي بوكسقا اۋىستى، دەپ حابارلايدى قازاقپارات ءتىلشىسى.

ەستەرىڭىزدە بولسا، وسىدان ءبىراز ۋاقىت بۇرىن ريو-دە جانەيرو وليمپياداسىنىڭ چەمپيونى دانيار ەلەۋسىنوۆ كاسىپقوي بوكسقا ءبىرجولا بەت بۇرعانىن مالىمدەگەن بولاتىن.

سونداي-اق، كەشە عانا قانات يسلام «Kazakh team» كومانداسىنا رۋسلان مىرساتايەۆ كەلىپ قوسىلعانىن ماقتانىشپەن جەتكىزگەن بولاتىن. ول الەۋمەتتىك جەلىسىندەگى ءوز پاراقشاسىندا: «امەريكاداعى «Kazakh team» كومانداسى قازاقتاردى الەمگە تانىتۋدى ماقسات ەتىپ وتىر. قازاقتىڭ جاستارى، قازاقتىڭ باتىرلارى كەلىڭدەر، ءبىزدىڭ كومانداعا قوسىلىڭدار! قازاقتىڭ تۋىن بىرگە كوتەرەيىك، العا قازاقستان!» - دەپ جازعان بولاتىن.

ال 23 جاستاعى الي بالويەۆ 18- اقپاندا ريگاداعى (لاتۆيا) وليمپيادا سپورت ورتالىعىندا ءوزىنىڭ كاسىپقوي بوكستاعى العاشقى جەكپە-جەگىن وتكىزۋدى بەلگىلەپ قويىپتى.

ول 4 راۋندتىق كەزدەسۋدە 32 جاستاعى جەرگىلىكتى بوكسشى ماركەس كوۆاليەۆسكيسپەن ايقاسقا تۇسەدى. جەرلەسىمىزدىڭ قارسىلاسى كاسىپقوي بوكستا 25 كەزدەسۋ وتكىزىپ، ەكەۋىندە تەڭ ناتيجە، ەكەۋىندە - جەڭىس، جيىرما بىرىندە جەڭىلىس (11 نوكاۋتپەن) تاۋىپتى.

قازاقستاندىق سپورتشى كاسىبي بوكستا رينگكە اۋىر سالماقتا (200 فۋنت - 90,7 كەلى) شىقپاق. الي الماتىداعى «ابىلاي حان» زالىندا، ساعاتبەك مۇساحانوۆتىڭ قول استىندا جاتتىعادى.

اۆتور: كۇنسۇلتان وتارباي