كيم چەن ىننىڭ اعاسى كىسى قولىنان قازا تاپتى

استانا. قازاقپارات - مالايزيا بيلىگى سولتۇستىك كورەيا باسشىسى كيم چەن ىننىڭ ۇلكەن اعاسىنىڭ قازا بولعانى تۋرالى حاباردى راستادى.

ونىڭ ءولىمىنىڭ سەبەبى ازىرگە رەسمي تۇردە ايتىلعان جوق، الايدا، وڭتۇستىك كورەيلىك جانە مالايزيالىق ب ا ق وكىلدەرىنىڭ اقپارىنشا، 45 جاستاعى كيم چون نام كۋالا-لۋمپۋر اۋەجايىندا كىسى قولىنان قازا تاپقان. بۇل تۋرالى BBC- ءدىڭ رەسەيلىك قىزمەتى حابارلادى.

بۇدان بۇرىن وڭتۇستىك كورەيانىڭ Chosun تەلەارناسى كيم چون نامدى بەلگىسىز بىرەۋلەر كۋالا لۋمپۋر اۋەجايىندا ۋلانعان ينە تىعىپ ءولتىردى دەگەن اقپارات تاراتقان بولاتىن.

جەرگىلىكتى پوليتسيا بولىمشەسىنىڭ باستىعى ابدۋل ازيز الي اۋەجايدا سولتۇستىك كورەيا ازاماتى ءوزىن ناشار سەزىنىپ، جەدەل جاردەم قىزمەتىمەن اۋرۋحاناعا جونەلتىلگەنىن، ءبىراق، ناۋقاس جولدا جان تاپسىرعانىن مالىمدەگەن.