اقتوبەدە اسكەرگە شاقىرىلاتىن جاستارعا پاتريوتتىق فيلمدەر كورسەتىلىپ جاتىر
دەپ حابارلايدى قازاقپارات ءتىلشىسى.
اقتوبە قالالىق قورعانىس ىستەرى جونىندەگى باسقارماسى 2000 -جىلى تۋعان ازاماتتاردى اسكەرگە دايىنداپ جاتىر. الدىمەن ولاردىڭ دەنساۋلىعى تەكسەرىلەدى. قازىرگى ۋاقىتتا جاستاردىڭ اراسىندا كوز اۋرۋى ءبىرىنشى ورىندا تۇر.
«قازىرگى كۇنى شاقىرۋ ۋچاسكەسىنە تىركەۋ جۇمىستارى ءجۇرىپ جاتىر. ماقساتى 2000 -جىلى تۋىلعان جاسوسپىرىمدەردىڭ سانىن ءبىلۋ، مەديتسينالىق كوميسسيادان وتكىزىپ، اسكەري قىزمەتكە دايىنداۋ. اسكەر قاتارىنا شاقىرىلاتىندار اراسىندا ءدىني كوزقاراس ۇستانۋشىلار بار، ءبىراق كوپ ەمەس. ءتۇسىندىرۋ جۇمىستارى جۇرگىزىلەدى. سەبەبى، وتان الدىنداعى ازاماتتىق بورىشىن وتەيتىندەر ناماز وقي المايدى. شاقىرىلعاندارعا ۇلتتىق رۋح، سەنىم، پاتريوتتىق تاربيە بەرۋ ءۇشىن فيلمدەر كورسەتىپ جاتىرمىز»، - دەدى اقتوبە قالالىق قورعانىس ىستەرى جونىندەگى باسقارمانىڭ بولىمشە باستىعى ەرنۇر اشىربەكوۆ.
ايتا كەتەيىك، قازىر جاستاردىڭ اراسىندا كوز اۋرۋى مەن تىرەك قيمىلى اۋرۋى، ياعني، ومىرتقانىڭ قيسايىپ كەتۋ دەرتى اسقىنىپ تۇر. بيىل قالا بويىنشا 2 مىڭنان استام جاستى تىركەۋ قاجەت بولسا، قاڭتار ايىنان باستاپ ولاردىڭ تەڭ جارتىسى مەديتسينالىق تەكسەرۋدەن ءوتىپ بولدى.
اۆتور: التىناي ساعىندىقوۆا
