قازاقستان مەن تۇركيا ەكى ەلدىڭ اسكەريلەرىنە بىردەي جاعداي جاسايدى

استانا. قازاقپارات - بۇگىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسى ءوتىپ، وندا «قازاقستان رەسپۋبليكاسىنىڭ ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى ارنايى ماقساتتاعى بولىمشەلەردىڭ وقۋ- جاتتىعۋلارىن وتكىزۋ كەزىندە قابىلداۋشى تاراپتىڭ قولداۋ كورسەتۋى تۋرالى ءوزارا تۇسىنىستىك مەموراندۋمىن راتيفيكاتسيالاۋ تۋرالى» زاڭ جوباسى تالقىلاندى،

  دەپ حابارلايدى قازاقپارات.

«موموراندۋمعا وتكەن جىلى 20 -قاڭتاردا قول قويىلدى. قۇجاتتىڭ ماقساتى تاراپتاردىڭ مىندەتتەمەلەرى مەن جاۋاپكەرشىلىگىن بەلگىلەۋ بولىپ تابىلادى. سونىمەن قاتار وقۋ- جاتتىعۋ وتكىزۋ كەزىندە قابىلداۋشى تاراپتىڭ قولداۋ كورسەتۋىنىڭ نەگىزگى قاعيداتتارىن ايقىندايدى» ، - دەدى زاڭ جوباسىن تانىستىرعان ق ر قورعانىس ءمينيسترىنىڭ ورىنباسارى تالعات مۇحتاروۆ.

مەموراندۋمنىڭ ەرەجەلەرىنە سايكەس، وقۋ- جاتتىعۋ وتكىزۋ بارىسىندا قابىلداۋشى تاراپ جىبەرۋشى جاقتىڭ بولىمشەلەرىنە تەحنيكا مەن قارۋ- جاراقتى اكەلۋدە، مەملەكەت ىشىندە الىپ جۇرۋدە، جولداردى پايدالانۋدا رۇقسات ەتەدى. سونداي- اق جەكە قۇرامدى قامتاماسىز ەتىپ وتىرعان ساپادا جىبەرۋشى تاراپتىڭ بولىمشەسىن تەگىن ورنالاستىرادى. جانارماي، كولىك جانە بايلانىس قۇرالدارى بەرىلەدى، مەديتسينالىق باعىتتا قىزمەتتەر كورسەتىلەدى.

«ءوز كەزەگىندە جىبەرۋشى تاراپتىڭ بولىمشەسى قابىلداۋشى مەملەكەتتىڭ زاڭناماسىن جانە وقۋ- جاتتىعۋلاردى وتكىزۋدىڭ جوسپارىندا ناقتىلانعان راسىمدەردى ساقتايدى. جاتتىعۋلار قازاقستان مەن تۇركيا قارۋلى كۇشتەرى ارنايى ماقساتتاعى بولىمشەلەرىنىڭ كاسىبي دەڭگەيىنىڭ جاۋىنگەرلىك دايارلىعىن ارتتىرۋعا ىقپال ەتەتىن بولادى. سونداي- اق اسكەرلەردىڭ اراسىنداعى ءوزارا ءىس- قيمىل ماسەلەلەرىن پىسىقتاۋعا مۇمكىندىك بەرەتىنىن اتاپ وتكەن ءجون»، - دەدى ت. مۇحتاروۆ.

ءوز كەزەگىندە سەنات دەپۋتاتى مۇحتار التىنبايەۆ قۇجاتتىڭ مىندەتى ەكى ەل قارۋلى كۇشتەرىنىڭ ارنايى ماقساتتاعى بولىمشەلەرىنىڭ بىرلەسكەن وقۋ- جاتتىعۋلارىن وكىزۋمەن بايلانىستى ماسەلەلەردى ەگجەي- تەگجەيلى رەتتەيتىنىن اتاپ ءوتتى.

 تالقىلاۋدان سوڭ كوميتەت مۇشەلەرى زاڭ جوباسىن پالاتانىڭ جالپى وتىرىسىنا شىعارۋ تۋرالى شەشىم قابىلدادى.

اۆتور: رۋسلان عابباسوۆ