سىرتقى ىستەر مينيسترلىگى ابيبۋللايەۆقا قاتىستى جانجالعا بارىنشا بايىپپەن قاراۋدا - ءابدىراحمانوۆ
دەپ حابارلايدى قازاقپارات.
«مەملەكەتتىك قىزمەت ادەبىن بۇزۋ جايىندا بولىپ وتىر. تولىقتاي العاندا، سىرتقى ىستەر مينيسترلىگى مەن ق ر پرەزيدەنتى جانىنداعى جوعارعى كونسۋلتاتيۆتىك كەڭەس بۇل ءىستى قاراۋعا بارىنشا بايىپتى كىرىستى. ءبىزدىڭ مينيسترلىكتە بۇزۋشىلىقتارعا قاتىستى نولدىك توزىمدىلىك ۇستانىمى بار. قازىرگى ۋاقىتتا بىزگە جوعارى ينستانتسيادان كەلەتىن ماتەريالداردى كۇتىپ وتىرمىز»، - دەدى مينيستر ۇكىمەت وتىرىسى الدىندا ب ا ق وكىلدەرىنە بەرگەن سۇحباتىندا.
ايتا كەتەيىك، تاياۋدا، مەملەكەتتىك حاتشى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى سىبايلاس جەمقورلىققا قارسى ءىس- قيمىل ماسەلەلەرى جونىندەگى كوميسسيا وتىرىسى ءوتىپ، وندا قازاقستان رەسپۋبليكاسىنىڭ پولشاداعى توتەنشە جانە وكىلەتتى ەلشىسى ا. ابيبۋللايەۆتى مەملەكەتتىك قىزمەت تۋرالى زاڭنامانى بۇزعانى ءۇشىن تارتىپتىك جاۋاپكەرشىلىككە تارتۋ تۋرالى ماسەلە قارالدى. كوميسسيا وتىرىسىنىڭ قورىتىندىسى بويىنشا ا. ابيبۋللايەۆقا قىزمەتكە سايكەستىگىنىڭ تولىق ەمەستىگى تۋرالى ەسكەرتۋ تۇرىندەگى تارتىپتىك جازا قولدانۋ جونىندە مەملەكەت باسشىسىنا ۇسىنىس ەنگىزۋگە شەشىم قابىلداندى.
اۆتور: مارلان جيەمباي
