ا ق ش- تا شەتەلدىكتەر اسىراپ العان قازاق بالالارى تۋرالى دەرەكتى فيلم ءتۇسىرىلدى

استانا. قازاقپارات - قازاقستان ازاماتى قانات بەيسەكەيەۆ ا ق ش- تا شەتەلدىكتەر اسىراپ العان قازاق بالالارى تۋرالى دەرەكتى فيلم ءتۇسىردى، دەپ حابارلايدى قازاقپارات.

كارتينا اعىلشىن تىلىندە، ورىس سۋبتيترلارىمەن جارىققا شىقپاق.

«ا ق ش- تا قازاق قىزىن كەزىكتىرىپ قالعانىمدا فيلم ءتۇسىرۋ تۋرالى وي كەلدى، سول كەزدە اسىراندى بالالار تۋرالى العاشقى رەپورتاج جاسادىم. ءبىراق بۇل تاقىرىپتا فيلم تۇسىرۋگە تاجىريبەم ازدىق ەتەتىندىگىن ۇقتىم، اعىلشىن ءتىلىن دە جەتىك مەڭگەرمەگەن ەدىم. ا ق ش- تاعى قازاقستاندىقتار تۋرالى دەرەكتى فيلمدەر ءتۇسىرىپ ءجۇرىپ، امەريكالىقتار اسىراپ العان قازاق بالالارى تۋرالى جاقسى دۇنيە تۇسىرسەم ەكەن دەگەن وي كەلە باستادى»، - دەيدى ول.

ونىڭ سوزىنشە، اتالمىش جوباعا 5 مىڭ ا ق ش دوللارى قاجەت بولدى. كراۋدفاندينگ كومپانياسى ارقىلى حالىق وعان بۇل قاراجاتتى 5 كۇندە جيناپ بەرگەن.

«مەنىڭ شىعارماشىلىعىممەن تانىس اۋديتوريام، كورەرمەندەرىم مەنى قولدادى. العاشقى تولەمدى الىشەر ەلىكبايەۆ جاسادى، وسىلايشا، الەۋمەتتىك جەلىنىڭ وزگە دە قولدانۋشىلارىنا قاراجات جىبەرۋلەرىنە ۇيىتقى بولدى. اۋدارىمدار 5-500 دوللار ارالىعىندا جاسالدى. جەلتوقساندا فيلمدى اياقتاۋدى جوسپارلاعان ەدىم، ءبىراق مونتاجداۋ كەزىندە تۋىندى تولىق اياقتالماعانىن ءتۇسىندىم. ماعان ا ق ش- قا قايتا ۇشۋىما تۋرا كەلدى. بۇل جولى جول شىعىنىن الماتىداعى ا ق ش كونسۋلدىعى وتەپ بەردى»، - دەيدى ول.

40 مينۋتتىق كارتيناعا بارلىق بالالاردىڭ وقيعالارى ەنگەن جوق. «فيلم امەريكانىڭ 7 شتاتىندا ءتۇسىرىلدى. وعان 7 مەن 21 جاس ارالىعىنداعى 8 كەيىپكەر كىردى. قازاقستاننان اسىراپ الىنعان بالالاردىڭ امەريكاداعى ءومىرىن اڭگىمەلەيمىن. «امەريكالىق مادەنيەتكە قالاي بەيىمدەلدى، قازاقستان ەستەرىندە قالدى ما، ءوز وتاندارىن قالاي ەلەستەتەدى جانە قازاقستانداعى ءومىرى تۋرالى نە بىلەدى؟» دەگەن سۇراقتار توڭىرەگىندە سۇحباتتار ءوربىدى. ولاردىڭ بارلىعى اسىراندى ەكەندىكتەرىن بىلەدى، تىم ەرتە جاستان امەريكاعا كەتكەنمەن، ءوز وتاندارى تۋرالى ازداعان ەستەلىكتەرى دە بار»، - دەپ اتاپ وتەدى رەجيسسەر.

فيلم اقپان ايىنىڭ سوڭىندا شىعادى. بەيسەكەيەۆ فيلمدى ءبىر جىل بويى، ارا-تۇرا ءۇزىلىس جاساپ ءتۇسىرىپ وتىرعان. سەبەبى مونتاجبەن نەگىزگى جۇمىسىنان تىس ۋاقىتتارى اينالىستى.

قانات بەيسەكەيەۆتىڭ سوزىنە قاراعاندا، جوبا كوممەرتسيالىق ەمەس جانە جاس رەجيسسەرلەردى شابىتتاندىرۋعا، از اقشاعا جاقسى دۇنيە تۇسىرۋگە بولاتىنىن تۇسىندىرۋگە ارنالعان.

«فيلمدى جالعىز ءتۇسىردىم. ءوزىم رەجيسسەر، وپەراتور، مانتاجداۋشى، رەداكتور، جۋرناليس، پروديۋسەر بولدىم. ارينە، ماعان پوستپروداكشن كەزىندە جىگىتتەر قولداۋ جاسادى»، - دەيدى جاس رەجيسسەر.

«فيلم مەيىرىمدىلىك، ماحاببات تۋرالى، ەكى ءتۇرلى مادەنيەت قالاي جاناسا الاتىندىعى تۋرالى، سەبەبى، ءبىز ءبارىمىز ادامبىز»، - دەيدى قانات بەيسەكەيەۆ.

مۇندا امەريكالىق وتباسىلار قازاقستاندا بالا اسىراپ الۋعا جاريالانعان موراتوريي تۋرالى، مەملەكەت مۇنداي شەشىمگە نە ءۇشىن كەلگەندىكتەرى جونىندە وي قوزعايدى.

«مەن بۇل فيلمدى كينوتەاترلاردا «اينالدىرۋدى» نەمەسە كينوفەستيۆالگە جىبەرۋدى جوسپارلاپ وتىرعانىم جوق. كارتينا قازاقستاندىقتارعا قولجەتىمدى بولعانىن قالايمىن. وعان ادامدار ءوز قاراجاتتارىن بەردى عوي. ەڭ باستىسى، ادامدار ءوز اقشالارىنىڭ نەگە جۇمسالعانىن ءبىلۋى كەرەك»، - دەيدى رەجيسسەر.

اۆتور: جاسۇلان جولدىبايەۆ