استاناعا كولىكپەن اقى تولەپ كىرۋگە ەشكىم مىندەتتەمەيدى - قالالىق شەشىمدەر بيۋروسى
الايدا ونى ەنگىزگەن كۇننىڭ وزىندە حالىقتى كولىكتەرىن تاستاپ، جاپپاي اۆتوبۋسقا مىنۋگە ەشكىم مىندەتتەمەيدى، دەپ حابارلايدى قازاقپارات.
«جالپى، بۇل اسپاننان الىنعان اقيقات ەمەس. ءبىزدىڭ زەرتتەۋىمىزگە سايكەس، تاڭعى ساعات 8:26 دا قالا بويىنشا كولىك كەپتەلىستەرى ءجيى بولادى. وسىنى زەردەلەي كەلە، ساعات 7:00 مەن 10:00 ءدىڭ ارالىعىندا تالاپكەر، قاراعاندى، ودان كەيىن قوسشى جاقتان كىرەتىن كولىكتەردىڭ سانى تىم كوپ بولاتىنىن انىقتادىق.
ەندى، ءدال وسى ۋاقىتتا قالاعا كىرۋدى اقىلى ەتسەك دەگەن وي بار. بۇل دەگەنىمىز، ساعات 7 مەن 10-نىڭ ارالىعىندا 100 تەڭگەڭدى تولەپ كىر نەمەسە ماشيناڭدى اۆتوتۇراققا قوي دا، كەلىپ تۇرعان اۆتوبۋسقا وتىرىپ، ارى قاراي كەتە بەر. ءبىراق ول كولىكتى تاستايتىن تۇراق قاجەت. ول - ءبىر. ەكىنشىدەن، اۆتوبۋستاردىڭ ءجۇرىسى ىڭعايلى بولعان ءجون. ال، ەندى كەز كەلگەن ادامدى توقتاتىپ، ونى قالاعا كىرگىزبەي، اقىنى تولەۋگە تالاپ قويىپ جاتقان ەشكىم جوق. مۇنىڭ بارلىعى ءالى تالقىلانىپ جاتىر. ءماسليحات دەپۋتاتتارى بەكىتپەسە، حالىق تالقىسىنا تۇسپەسە، ول باستامانىڭ جۇزەگە اسپايتىنى بەلگىلى»، - دەدى قايساروۆ قازاقپارات تىلشىسىنە بەرگەن سۇحباتىندا.
ايتا كەتەيىك، وسىدان ءبىر اي بۇرىن استانا قالاسىنىڭ كولىك كەشەنىن دامىتۋ ماسەلەلەرىنە ارنالعان قوعامدىق تىڭداۋلاردا كەپتەلىس كوپ بولاتىن ۋاقىتتا قالاعا كولىكپەن كىرۋدىڭ اقىلى جۇيەسىن ەنگىزۋ جايىندا ايتىلدى. جوسپار بويىنشا، تاڭعى ساعات 7:00 مەن 10:00 ءدىڭ ارالىعىندا كوكشەتاۋ، قوستاناي، پاۆلودار، قاراعاندى، قوسشى مەن قورعالجىن باعىتتارىنان قالاعا جەكە كولىكپەن كىرۋ اقىلى بولادى.
«وسى ىسپەتتى شارالاردان كەيىن ادامدار قوعامدىق كولىككە اۋىسادى دەپ ويلامىز. قالانىڭ سىرتىندا جەكە كولىك يەلەرى ءۇشىن اۆتوتۇراقتار اشىلادى. كولىكتى سول جەرگە تاستاپ، اۆتوبۋسقا وتىرۋعا بولادى»، - دەدى استانا LRT» « كومپانياسىنىڭ كولىك قاتىناسى بويىنشا ديرەكتورى رۋستام حاليليەۆ.
ونىڭ ايتۋىنشا، بۇگىندە ەلورداعا كۇن سايىن سىرتتان 75 مىڭنان استام كولىك كەلەدى. سونىڭ 30-40 پايىزى - تاڭعى ۋاقىتتا كىرەتىن ماشينالار.
اۆتور: ارمان اسقاروۆ
