ەلىمىزدىڭ ءدىني باسقارماسى قۇلپىتاسقا سۋرەت سالۋعا قاتاڭ تىيىم سالدى
قابىلدانعان قاعيدالار مەن تالاپتار ماتىنىندە قابىردى قورشاۋ، قابىر ۇستىنە قۇرىلىس نىساندارىن سالۋ، ءقابىر باسىنا بەلگى تاس قويۋ، ونىڭ اينالاسىن تازالاۋ، تۇزەتۋ، ت. ب. ماسەلەلەر قامتىلعان.
«مۇسىلمان زيراتىنىڭ قاعيدالارى مەن تالاپتارى» دەپ اتالاتىن قۇجات ماتىنىندە: «قابىر تاپتالىپ، اياقاستى بولماۋى ءۇشىن قوعامدىق زيراتتى تۇتاس قورشاعان ابزال. تۇتاس قورشالعان زيراتتىڭ ىشىندەگى ءقابىردى جەكە-جەكە قورشاۋ قاجەت ەمەس. ەگەر قابىرستان تولىقتاي قورشالماسا، اياققا تاپتالماس ءۇشىن قابىردى شاريعات شەڭبەرىندە ءتورتقۇلاق ەتىپ قورشاۋعا رۇقسات بەرىلەدى.
قابىر ۇستىنە قۇرىلىس نىساندارىن سالۋعا شاريعي تۇرعىدان رۇقسات جوق. ساحابا جابيردەن جەتكەن حاديستە: «پايعامبارىمىز (اللانىڭ وعان سالاۋاتى مەن سالەمى بولسىن) ءقابىردى كوتەرۋدەن، ۇستىنە وتىرۋدان، ۇستىنە قۇرىلىس سالۋدان تىيدى» (يمام مۋسليم، جانازا بابى)، - دەگەن. ەگەر ءقابىر باسىنا كەسەنە سالىنىپ قويىلسا، ونى بۇزۋعا بولمايدى. الايدا، كەيبىر يسلام عالىمدارىنىڭ پىكىرى بويىنشا، عۇلاما- عالىمنىڭ، ەل بيلەگەن حان-سۇلتانداردىڭ، ءبي-باتىرلاردىڭ كەسەنەسىن كوتەرۋگە رۇقسات بەرىلگەن («حاشياتۋ يبن ابيدين»، 2 توم، 237-بەت).
ءقابىر باسىنا بەلگى رەتىندە تاس قويۋعا رۇقسات ەتىلەدى. پايعامبارىمىز (اللانىڭ وعان سالاۋاتى مەن سالەمى بولسىن) ءوزىنىڭ ءسۇت باۋىرى وسمان يبن مازۋندى جەرلەپ بولعان سوڭ، قابىرىن وڭاي تاۋىپ الۋ ماقساتىندا ۇلكەن ءبىر تاستى كوتەرىپ اكەلىپ بەلگى ءۇشىن باس جاعىنا قويعان (ءابۋ ءداۋىد. جانازا بابى).
الايدا، بەلگى رەتىندە قويىلعان قۇلپىتاسقا سۋرەت سالۋعا، سونداي- اق قۇلپىتاستى ءمۇسىن بەينەسىندە ويىپ جاساۋعا بولمايدى. تاسقا ءمايىتتىڭ اتى- ءجونىن، تۋعان جانە دۇنيەدەن وتكەن كۇنىن جازۋعا، سونداي- اق، اي بەلگىسىن قويۋعا رۇقسات. ءبىراق قۇران اياتتارى اياقاستى بولىپ كەتپەس ءۇشىن قۇلپىتاسقا جازباعان ءجون. قابىردىڭ لاقاتىن جاباتىن ماتەريالعا كۇيدىرىلگەن كىرپىش، قارا قاعاز، سەللوفان پايدالانباعان دۇرىس. قابىردى جابۋ ءۇشىن تابيعي ماتەريالداردان اعاش، تاقتاي، شىبىق، پليتانى پايدالانۋعا بولادى. قابىر اينالاسىن تازالاۋعا، تۇزەتۋگە رۇقسات. ال، ونى جاڭالاۋعا، بوياۋعا ت. ب. بولمايدى.
قابىردىڭ توپىراعى تۇيەنىڭ وركەشىندەي بيىكتىكتە عانا جەردەن كوتەرىلۋى ءتيىس. قابىر تەك قانا ءوز توپىراعىمەن عانا كومىلەدى. سىرتتان باسقا توپىراق قوسۋ، ءۇستىن تەگىستەپ، سەمەنتپەن قۇيۋ نەمەسە ءتۇرلى مايلى نارسەلەر جاعۋ - ماكرۇھ (جاعىمسىز ارەكەت). مۇسىلماننىڭ قابىرى وزگە ءدىن وكىلدەرى زيراتىمەن ارالاسپاي، بولەك قازىلۋى ءتيىس»، - دەلىنگەن.
