اتاقتى اقىن ولجاس سۇلەيمەنوۆ وڭتۇستىك جاستارىمەن كەزدەستى
شارادا اقىننىڭ اتاقتى شىعارمالارىنان ۇزىندىلەر وقىلىپ، قالامگەر ءوزىنىڭ ءومىرى، شىعارماشىلىق جەتىستىكتەرى تۋرالى قويىلعان جاستاردىڭ ساۋالدارىنا جان-جاقتى جاۋاپ بەردى. رۋحاني شاراعا ۇيىتقى بولعان وبلىس اكىمى جانسەيىت تۇيمەبايەۆ مۇنداي كەزدەسۋلەردىڭ جاستار ءۇشىن بەرەرى مول ەكەنىن تىلگە تيەك ەتتى.
«قازاقتا ۇلى تۇلعالار جەتكىلىكتى. سولاردىڭ ءبىرى جانە بىرەگەيى - ولجاس سۇلەيمەنوۆ اعامىز. بار عۇمىرىن قازاق رۋحانياتىنىڭ دامۋىنا سارقي جۇمساپ كەلە جاتقان قالامگەردىڭ وڭتۇستىك قازاقستانعا ساپارىن ءتيىمدى پايدالانىپ، جاستارمەن كەزدەسۋ ۇيىمداستىرۋدى ءجون كوردىك. مۇنداي كەزدەسۋلەر جاستارعا جاڭا سەرپىن، جاقسى ونەگەلى تاربيە بەرەتىنى ءسوزسىز. وسىنداي شارالاردىڭ ارقاسىندا ءوڭىر جاستارىنىڭ مادەنيەتى قالىپتاسادى. قاي باعىتتا ءوسىپ- جەتىلۋ كەرەكتىگى تۋرالى تانىم- تۇسىنىگى ارتادى»، - دەدى جانسەيىت قانسەيىت ۇلى.
ەمەن-جارقىن اشىق وي الماسۋ كەشىندە قۋاتتى قالام، شۋاقتى ويدىڭ يەسى جاستاردى بار كۇش-جىگەرىن يگى ىسكە ارناۋعا، قوعامدىق ماسەلەلەردە بەلسەندى بولۋعا شاقىردى. ەل مادەنيەتى مەن رۋحانياتى سالاسىندا اتقارىلىپ جاتقان يگى ىستەردى تىلگە تيەك ەتتى. «وڭتۇستىك مەنىڭ ومىرىمدە ورنى ەرەكشە ولكە. مۇنداعى جۇرت قازاقتىڭ قايماعىن بۇزباي، سالت-ءداستۇرىن، مادەنيەتىن، ادەبيەتىن ساقتاپ كەلەدى. مەن قازاقستاننىڭ بارلىق ايماقتارىنا ىسساپارمەن شىعىپ، سول وڭىرلەردەگى زيالى قاۋىم وكىلدەرىمەن، جاس بۋىنمەن كەزدەسۋلەر وتكىزىپ ءجۇرمىن. مۇنداي كەزدەسۋلەر قالامگەر قاۋىمعا قاشاندا شالقار شابىت، ەرەكشە تالپىنىس، كۇش-قۋات بەرەدى» دەدى ولجاس سۇلەيمەنوۆ.
