دارىگەرلەر الداعى ۋاقىتتا قاعازباستىلىقتان ارىلادى

استانا. قازاقپارات - قازاقستاندا الداعى ۋاقىتتا دارىگەرلەر قاعازباستىلىقتان ارىلادى. بۇل تۋرالى «دەنساۋلىق ساقتاۋدى دامىتۋ رەسپۋبليكالىق ورتالىعى» ش ج ق ر م ك باس ديرەكتورىنىڭ مىندەتىن اتقارۋشى اينۇر ايىپحانوۆا ءمالىم ەتتى، دەپ حابارلايدى قازاقپارات.

 «جالپى، ەلىمىزدەگى دەنساۋلىق سالاسىنداعى زاڭنامالار كەڭەستىك كەزەڭنەن كەلە جاتىر، زامانعا ساي وزگەرمەگەن. ماسەلەن، كاسىپكەر ءوز بيزنەسىن مەديتسينا سالاسىندا اشقىسى كەلسە كوپتەگەن كەدەرگىگە تاپ بولادى. سوندىقتان قازىرگى ۋاقىتتا بۇل سالاداعى بارلىق زاڭناماعا ساراپتاما جۇرگىزىپ، تەكسەرۋ جۇرگىزۋ قاجەت»، - دەدى ول ق ر پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىنداعى مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ ماسەلەلەرىنە ارنالعان دوڭگەلەك ۇستەل اياسىندا ب ا ق وكىلدەرىنە بەرگەن سۇحباتىندا.

ونىڭ ايتۋىنشا، قازىرگى ۋاقىتتا دەنساۋلىق ساقتاۋ مينيسترلىك تارابىنان ەكى ۇلكەن باعىتتا جۇمىستار اتقارىلماق.

 «ونىڭ ءبىرى - مەديتسينا سالاسىن تەحنولوگيالىق جاڭعىرتۋ. ياعني، مەديتسينا قىزمەتكەرلەرىن قاعازباستىلىقتان ارىلتۋ، ەلەكتروندى اقپارات الماسۋعا كوشۋ بولىپ وتىر. ال ەكىنشى باعىت - زاڭنامالاردى وزگەرتۋ، ولاردى حالىقارالىق تاجىريبەگە سايكەستەندىرۋ. ويتكەنى، بىزدەگى كەيبىر تالاپتار شەتەلدە جوق. مىسالى، بىزدەگى تالاپقا سايكەس كەز كەلگەن ەمحانادا جۇرگىزۋشىگە ارنالعان بولمە 10 شارشى مەتردەن كەم بولماۋى ءتيىس. مىنە، ءبىزدىڭ زاڭنامامىزدا وسىنداي ورەسكەلدىكتەر دە بار. توق ەتەرىن ايتقاندا، قاجەتى جوق، نەگىزسىز تالاپتاردى جويۋىمىز كەرەك»، - دەدى ول.

اۆتور: مارلان جيەمباي