كاسىپكەرلەر استانانىڭ اۋىل شارۋاشىلىق جەرلەرىنە تۇرعىن ۇيلەر سالۋدى ۇسىندى
جوسپار بويىنشا وندا تۇرعىن ۇيلەر سالىنۋى قاجەت. الايدا، ون جىلدان بەرى ول جەرلەر بوس جاتىر. سەبەبى اۋىل شارۋاشىلىعى جەرلەرىن پايدالانۋ ماقساتىن وزگەرتۋ كەرەك. ال وعان تولەنەتىن مەملەكەتتىك باج سالىعىن كاسىپكەرلەرگە جۇكتەپ قويعان، دەپ حابارلايدى قازاقپارات ءتىلشىسى.
«ءيا، زاڭدا «جەردى پايدالانۋ ماقساتى» دەگەن تۇسىنىك بار. قازىرگى كەزدە ول جەرلەر اۋىل شارۋاشىلىعىنا ارنالعان جەرلەر بولىپ سانالادى. الايدا، قالانىڭ باس جوسپارىنا سايكەس، ول جەردە تۇرعىن ۇيلەر سالىنۋى قاجەت. ەندى، سول جەردىڭ ماقساتىن وزگەرتۋ كەرەك. جالپى، ءبىزدىڭ ەسەبىمىزگە سايكەس، مەملەكەتتىك باج سالىعىنىڭ كولەمى 500 ميلليارد تەڭگەنى قۇراپ وتىر. قالا كاسىپكەرلەرى ونداي سومانى كوتەرە المايدى. سوندىقتان مەملەكەت ونى ءوزى وزگەرتۋى كەرەك دەپ سانايمىز. سەبەبى كاسىپكەرلەر ول جەرلەردى ءوز ەركىمەن قالانىڭ اۋماعىنا كىرگىزگەن جوق. ونى مەملەكەت كىرگىزىپ الدى. دەمەك، تۇرعىن ءۇي سالامىن دەسە، ءوزى دە اتسالىسۋى قاجەت»، - دەدى تاسماعانبەتوۆ قازاقپارات تىلشىسىنە بەرگەن سۇحباتىندا.
ونىڭ ويىنشا، مەملەكەت اتالعان اۋىل شارۋاشىلىعى جەرلەرىنىڭ ماقساتىن وزگەرتۋگە كومەكتەسسە، كاسىپكەرلەر ەمىن-ەركىن قۇرىلىس جۇمىستارىن باستاي الاتىن ەدى. سونداي-اق، ول جەردە مەملەكەتتىك- جەكەمەنشىك سەرىكتەستىك مەحانيزمى نەگىزىندە ءۇي سالىپ، كەزەكتە تۇرعان ازاماتتارعا تاراتۋعا ابدەن بولادى.
«اكىمدىك جەردىڭ ماقساتىن اقىسىز اۋىستىرىپ، ينفراقۇرىلىم جەلىلەرىن تارتىپ بەرسە، كاسىپكەرلەر تۇرعىن ۇيلەر سالا الادى. سونداي ءبىر مەملەكەتتىك-جەكەمەنشىك سەرىكتەستىك جوباسىن ازىرلەۋگە بولادى. نەگىزى، ءدال قازىر استانا ماڭايىندا تاراتۋعا جاتاتىن جەرلەر جوق. الايدا جاڭاعى جەرلەرگە ءۇي سالىپ، كەزەكتە تۇرعان ازاماتتارعا تاراتۋعا ابدەن بولادى»، - دەپ اتاپ كورسەتتى پالاتا باسشىسى.
اۆتور: ارمان اسقاروۆ
