قازاقتىڭ بەلگىلى بالالار اقىنى قايتىس بولدى

استانا. قازاقپارات - قازاقتىڭ بەلگىلى بالالار اقىنى ەسكەن ەلۋبايەۆ قايتىس بولدى. بۇل تۋرالى قازاقستان جازۋشىلار وداعىنىڭ مۇشەسى ءارى ادەبي قىزمەتكەرى، جازۋشى، ساتيريك بەيبىت سارىباي فەيسبۋكتاعى پاراقشاسىندا حابارلادى.

«بەلگىلى بالالار اقىنى ەسكەن ەلۋباي اعامىز قايتىس بولدى. قوشتاسۋ ءراسىمى ەرتەڭ 10:00 دە جازۋشىلار وداعىندا بولادى»، دەلىنگەن حابارلامادا.

ەسكەن ەلۋبايەۆ 1942-جىلى 18- اقپاندا جامبىل وبلىسى قورداي اۋدانىنداعى وتار ستانساسىندا تۋعان. 1958-جىلى وتار ستانساسىنداعى 29№ تەمىرجول ورتا مەكتەبىن بىتىرگەن. قاز م ۋ- ءدىڭ فيلولوگيا فاكۋلتەتىن 1966-جىلى تامامداعان.

1966-جىلدان باستاپ «قازاقستان پيونەرى» (قازىرگى «ۇلان») گازەتىندە، «جالىن»، «ونەر»، «بالاۋسا» باسپالارىندا جانە «بالدىرعان» جۋرنالىنىڭ باس رەداكتورىنىڭ ورىنباسارى بولىپ قىزمەت ىستەگەن.

ەڭ العاشقى ولەڭى 1958-جىلى رەسپۋبليكالىق «ارا» جۋرنالىندا جاريالاندى.

نەگىزىندە اقىن شىعارماشىلىعىن بالالار تاقىرىبىنا ارنادى. ونىڭ «بولاتبەك» پەساسى رەسپۋبليكالىق قۋىرشاق تەاترىندا قويىلعان. حالىقارالىق «الاش» ادەبي سىيلىعىنىڭ لاۋرەاتى (1994). ۇلتتىق «استانا -بايتەرەك» كونكۋرسىنىڭ ەكى دۇركىن ءبىرىنشى جۇلدەگەرى (2007-2008)، حالىقارالىق «دارابوز» بايگەسىنىڭ ەكىنشى جۇلدەگەرى (2008). «قازاقستان تاۋەلسىزدىگىنە 10 جىل» مەدالىمەن ماراپاتتالعان، مەملەكەتتىك گرانت يەگەرى بولعان.

قىرىقتان استام كىتابى قازاق جانە ورىس تىلدەرىندە جارىق كورگەن. «بالابەك»، «اسار» پەسالارى رەسپۋبليكانىڭ كوپتەگەن تەاترلارىندا قويىلىپ كەلەدى. «ساعان كۇشىك كەرەك پە؟» كينو فيلمى اۆتوردىڭ پەساسى بويىنشا تۇسىرىلگەن. شىعارمالارى قازاق جانە ورىس مەكتەپتەرىنە ارنالعان وقۋلىقتارعا ەنگەن.

شىعارمالارى: كوك جەيدە. ولەڭدەر. ا. «جازۋشى»، 1967؛ كوكپار. ولەڭدەر. ا.  «جازۋشى»، 1970؛ بالامىسىڭ دەگەن. ولەڭدەر. ا. «جالىن»، 1981؛ وجەت. پەسالار، تاقپاقتار. ا. «ونەر»، 1984؛ كتو سيلنەە؟ ستيحي. ا. «جالىن»، 1984.

اۆتور: ەربول جانات